కాంగ్రెస్ భిక్షతోనే కేసీఆర్ సీఎం అయ్యారు: జగ్గారెడ్డి

దిశ, న్యూస్‌ బ్యూరో: కాంగ్రెస్ పార్టీ భిక్షతోనే కేసీఆర్ తెలంగాణకు సీఎం అయ్యారని ఎమ్మెల్యే జగ్గారెడ్డి అన్నారు. ప్రత్యేక తెలంగాణ రాష్ట్రం కోసం సోనియా గాంధీతో మాట్లాడి రాష్ట్ర సాధనకు కారణమైన కాంగ్రెస్ నాయకులను బఫూన్‌గాళ్లు అని మాట్లాడటం కేసీఆర్ అహంకారమని ఆయన చెప్పారు. బుధవారం మీడియా సమావేశంలో ఎమ్మెల్యే జగ్గారెడ్డి మాట్లాడుతూ,కాంగ్రెస్ పార్టీ నాయకులు రైతుల సమస్యలపై చేసిన దీక్షలను చూసి భయాందోళనకు గురైన కేసీఆర్ నోటికి వచ్చినట్లు ప్రతిపక్షాల‌పై ద్వజమెత్తారని తెలిపారు.

ప్రగతి భవన్‌లో ముఖ్యమంత్రి కేసీఆర్‌ ఉన్నట్లు రాష్ట్రంలో రైతులందరు సుఖంగా లేరని విమర్శించారు. రైతుల సమస్యలపై మాట్లాడితే చిల్లరగాళ్లని వర్ణించడం సీఎం అహంకారానికే సాటి అని ఎద్దేవా చేశారు. తిన్నింటి వాసాలు లెక్కబెట్టే వ్యక్తి కేసీఆర్ అని విమర్శించారు. సీఎం కేసీఆర్ చిల్లర రాజకీయాలు, అహంకారమే ఆయన పతనానికి దారితీస్తుందన్నారు. కుర్చీ పోయిన మరునాడు కేసీఆర్‌ను పట్టించుకునే నాథుడే ఉండడని జగ్గారెడ్డి ఎద్దేవా చేశారు. రాష్ట్రంలో కేసీఆర్ పాలన తాగండి..చావండి…ఖజానా నింపండి అన్నట్లుగా ఉందని విమర్శించారు.

Tags: Congress, Mla Jagga Reddy, press meet, fires on Cm Kcr, Pragathi bhavan, Sonia Gandhi, Farmer