ఆ పని చేసి చూపించిన అసలు సిసలైన వ్యక్తి ఎన్టీఆర్: చంద్రబాబు

దిశ, వెబ్‌డెస్క్: తెలుగుదేశం పార్టీ వ్యవస్థాపకులు, ప్రముఖ సినీ నటుడు, దివంగత మాజీ సీఎం నందమూరి తారక రామారావు శత జయంతి ఉత్సవాలు ఘనంగా జరుగుతున్నాయి. ఇప్పటికే పార్టీ ఆధ్వర్యంలో ఆయన శతజయంతి వేడుకలు సినీ, రాజకీయ ప్రముఖులతో అట్టహాసంగా నిర్వహించిన విషయం తెలిసిందే. తాజాగా.. ఇవాళ(మే 28) ఎన్టీఆర్ జయంతి సందర్భంగా టీడీపీ అధినేత చంద్రబాబు నాయుడు నివాళ్లు అర్పించారు. రాజకీయాల్లో అనేక సంక్షేమ పథకాలను ఎన్టీఆర్‌ ప్రవేశపెట్టారని గుర్తు చేశారు.

‘‘అధికారానికి సరైన నిర్వచనం మానవసేవే అని నమ్మి, ఆచరించిన రాజకీయ నాయకుడు ఎన్టీఆర్. పేదరికం విధిరాత కాదని, పాలనా లోపమని... చిత్తశుద్ధి ఉంటే పేదరిక నిర్మూలన సాధ్యమే అని తన సంక్షేమ పాలనతో నిరూపించిన అసలు సిసలైన మానవతావాది ఎన్టీఆర్. అటువంటి మహామనీషి మన తెలుగు నేలపై కథానాయకుడిగా, ప్రజా నాయకుడిగా నిలిచి వెలగడం తెలుగువారి అదృష్టం. ఎన్టీఆర్ శతజయంతి వేళ ఆ మహానుభావుని ఆశయాలను స్మరించుకుందాం’’ అంటూ చంద్రబాబు నాయుడు ట్వీట్‌లో పేర్కొన్నారు.