అమెరికా స్టాక్ ఎక్స్ఛేంజీ నుంచి అదానీ పోర్ట్స్ తొలగింపు!

దిశ, వెబ్‌డెస్క్: అమెరికాకు చెందిన స్టాక్ ఎక్స్ఛేంజీ ఎస్ అండ్ పీ డౌజోన్స్ భారత్‌కు చెందిన అదానీ పోర్ట్స్ అండ్ స్పెషల్ ఎకనమిక్ జోన్ లిమిటెడ్‌ను లిస్టింగ్ నుంచి తొలగిస్తున్నట్టు ప్రకటించింది. మయన్మార్ మిలిటరీతో వ్యాపార సంబంధాలను కలిగి ఉన్న కారణంతో ఈ నిర్ణయం తీసుకున్నట్టు తెలిపింది. అదానీ పోర్ట్స్ కంపెనీ యంగూన్‌లో ఓ రేవును నిర్మిస్తోంది. అలాగే మయన్మార్ ఎకనమిక్ కార్పొరేషన్(ఎంఈసీ) నుంచి భూమిని లీజుకు తీసుకుంది. దీనిపై అదానీ గ్రూప్ స్పందించలేదు. ఎంఈసీ నుంచి భూమిని లీజుకు తీసుకున్న అంశంపై అదానీ గ్రూప్ మార్చిలో స్పందించింది. ఈ ఒప్పందానికి సంబంధించి భాగస్వామ్యంపై చర్చించనున్నట్టు ప్రకటించింది. ఫిబ్రవరి 1న మయన్మార్‌లో సైన్యం తిరుగుబాటు చేసి అధికారాన్ని చేజిక్కించుకున్న సంగతి తెలిసిందే. ఈ క్రమంలోనే అమెరికా, బ్రిటన్ దేశాలు మయన్మార్ ఎకనమిక్ హోల్డింగ్స్ పబ్లిక్ కంపెనీ లిమిటెడ్, మయన్మార్ ఎకనమిక్ కారిడార్‌లపై ఆంక్షలను విధిస్తున్నాయి. అదేవిధంగా అదానీ పోర్ట్స్ అండ్ స్పెషల్ ఎకనమిక్ జోన్ లిమిటెడ్‌ను గురువారం ట్రేడింగ్ జాబితా నుంచి తొలగించే అవకాశాలున్నట్టు తెలుస్తోంది.