గంజాయి విక్రయిస్తున్న ఇద్దరు అరెస్ట్​

దిశ,మేడ్చల్ టౌన్ : గంజాయిని విక్రయించేందుకు ప్రయత్నిస్తున్న ఇద్దరిని మేడ్చల్ పోలీస్ లు పట్టుకుని రిమాండ్ కు తరలించారు. పోలీసుల కథనం ప్రకారం... ఒడిశాకు చెందిన జగదీశ్ సాహు మేడ్చల్ మండలం రాజబొల్లారం పంచాయతీ మెడిసిటీ క్రాస్ రోడ్డులో నివాసం ఉంటున్నాడు. అతడితో పాటు ఘనపూర్ తండాకు చెందిన నునావత్ రాజ్ కుమార్లు ఒడిశాకు చెందిన జగదీశ్ బెహరా నుంచి 500 గ్రాముల గంజాయి కొనుగోలు చేశారు.

అందులో 150 గ్రాముల వరకు వినియోగించగా మిగితా 350 గ్రామాలకు వినియోగించే వారికి విక్రయించేందుకు సిద్ధమయ్యారు. విశ్వసనీయ సమాచారం మేరకు పోలీసులు దాడి చేయగా వారి వద్ద 350 గ్రాముల గంజాయి లభించింది. విచారణలో ఒడిశాకు చెందిన జగదీశ్ బెహరా నుంచి గంజాయి కొనుగోలు చేసినట్టు తేలింది. జగదీశ్ సాహు, నునవత్ రాజ్ పై కేసు నమోదు చేసి రిమాండ్ కు తరలించారు. వారి వద్ద నుండి మొబైల్ ఫోన్లు, యాక్టివా ద్విచక్ర వాహనం స్వాధీనం చేసుకున్నారు. జగదీశ్ బెహరాను పట్టుకోవడానికి ఒక బృందాన్ని ఏర్పాటు చేసినట్టు పోలీసులు తెలిపారు.