భర్తను చంపడానికి తండ్రికి హెల్ప్ చేసిన కూతురు.. షాక్‌లో పోలీసులు!
దిశ, దేవరకద్ర/చిన్నచింతకుంట: కూతురుతో కలిసి అల్లుడిని హత్య చేసిన సంఘటన చిన్నచింతకుంట మండలంలో ఆలస్యంగా వెలుగులోకి వచ్చింది. సీసీకుంట పోలీసులు తెలిపిన వివరాల ప్రకారం మూసాపేట మండలం వేముల గ్రామానికి చెందిన సాయన్న (38) ఆదివారం అత్తగారి గ్రామం కురుమూర్తికి వచ్చారు. ఆ రోజు నుండి తిరిగి రాకపోవడంతో మంగళవారం మృతుని కుటుంబ సభ్యులు ఫిర్యాదు మేరకు మిస్సింగ్ కేసు నమోదు చేశారు. రంగంలోకి దిగిన సిసికుంట పోలీసులు మృతుడి భార్య శివమ్మ, మామ వెంకటన్నను అదుపులోకి తీసుకొని విచారించగా షాకింగ్ విషయం వెలుగుచూసింది.
కూతుర్ని వేధిస్తున్నాడనే నెపంతో మామే అల్లుడిని హతమర్చాడు. ఈ దారుణానికి ఆయన కూతురు (హతుడి భార్య) కూడా తోడవ్వడం స్థానికులను షాక్‌కు గురిచేసింది. అల్లుడిని హత్య చేసి, మృతదేహాన్ని గోనెసంచిలో మూటగట్టి ఊరు సమీపాన ఉన్న వాగులో పూడ్చినట్లు పోలీసులు తెలిపారు. కేసు నమోదు చేసుకొని దర్యాప్తు చేస్తున్నట్లు సిసి కుంట ఎస్సై శేఖర్ తెలిపారు.
