50 వేల మంది ఉద్యోగులకు అందని పీఆర్సీ

దిశ, తెలంగాణ బ్యూరో : రాష్ట్ర ప్రభుత్వం ఇటీవల ఉద్యోగులకు 30 శాతం పీఆర్సీని ప్రకటించిందని, అయితే 1 జూలై 2018 తర్వాత పలు శాఖల్లో చేరిన సుమారు 50 వేల మంది ఉద్యోగులకు పీఆర్సీ, ఫిట్​మెంట్​అమల్లోకి రాలేదని దుబ్బాక ఎమ్మెల్యే రఘునందన్​రావు తెలిపారు. శుక్రవారం నిర్వహించిన అసెంబ్లీ సమావేశాల్లో ఆయన ప్రభుత్వానికి పలు ప్రశ్నలు సంధించారు. కొత్తగా చేరిన ఉద్యోగులకు పీఆర్సీ, ఫిట్​మెంట్ అందక వారు తీవ్ర ఇబ్బందులు ఎదుర్కొంటున్నారని తెలిపారు. వీరందరికీ 30 శాతం పీఆర్సీని అమలుచేయాలని డిమాండ్​చేశారు. రాష్ట్ర ప్రభుత్వం హోంగార్డులకు 30 శాతం పీఆర్సీ అందజేస్తుందో లేదో క్లారిటీ ఇవ్వాలని రఘునందన్​రావు డిమాండ్​చేశారు.