ICC World Cup 2023: హిట్‌మ్యాన్‌ అరుదైన ఘనత.. తొలి భారత క్రికెటర్‌గా
దిశ, వెబ్‌డెస్క్: ICC World Cup 2023లో టీమిండియా కెప్టెన్‌ రోహిత్‌ శర్మ తన అద్బుతమైన ఫామ్‌ను కొనసాగిస్తున్నాడు. ధర్మశాల వేదికగా న్యూజిలాండ్‌తో జరిగిన మ్యాచ్‌లో మరోసారి కీలక ఇన్నింగ్స్‌ ఆడాడు. ఈ మ్యాచ్‌లో హిట్‌మ్యాన్‌ 4 ఫోర్లు, 4 సిక్స్‌లతో 46 రన్స్ చేసి అద్భుతమైన ఆరంభాన్ని ఇచ్చాడు. ఈ మ్యాచ్‌లో 4 సిక్స్‌లు కొట్టిన రోహిత్‌ శర్మ.. ఓ అరుదైన ఘనతను సాధించాడు.
అంతర్జాతీయ వన్డేల్లో ఒక క్యాలెండర్ ఇయర్‌లో 50 లేదా అంతకంటే ఎక్కువ సిక్స్‌లు కొట్టిన మొదటి ఆటగాడిగా హిట్‌మ్యాన్‌ నిలిచాడు. రోహిత్‌ ఈ ఏడాదిలో ఇప్పటివరకు 53 సిక్స్‌లు బాదాడు. ఓవరాల్‌గా ఈ ఘనత సాధించిన జాబితాలో రోహిత్‌ మూడో ప్లేస్‌లో నిలిచాడు. ఈ ఫీట్‌ నమోదు చేసిన జాబితాలో దక్షిణాఫ్రికా దిగ్గజం ఏబీ డివిలియర్స్‌(58 సిక్స్‌లు) తొలి స్ధానంలో ఉండగా.. వెస్టిండీస్‌ లెజెండ్‌ క్రిస్‌ గేల్‌(56 సిక్స్‌లు) రెండో స్ధానంలో కొనసాగుతున్నాడు.
