స్కూల్‌లో కాల్పులు: 11 మంది మృతి
మాస్కో: రష్యాలోని ఓ పాఠశాలలో కాల్పులు కలకలం రేపాయి. పాఠశాల విద్యార్థులపై గుర్తు తెలియని వ్యక్తి ఒకరు మంగళవారం కాల్పులకు తెగపడ్డారు. ఈ ఘటనలో 11 మంది మృతి చెందారు. రష్యాలోని కజాన్ సిటీలో ఓ పాఠశాలలో మంగళవారం గుర్తు తెలియని దుండగుడు ప్రవేశించాడు. పాఠశాలలోని రెండవ అంతస్తులో ఉన్న తరగతి గదిలోకి అతను ప్రవేశించాడు. వెంటనే తరగతి గదిలో విద్యార్థులపై విచక్షణ రహితంగా కాల్పులు జరిపాడు. దీంతో 8 మంది విద్యార్థులు, 1 ఉపాధ్యాయుడు మరణించారు. కాల్పులు జరుగుతుండగా భయాందోళనతో కొందరు విద్యార్థులు భవనం నుంచి కిందకు దూకి పారిపోవడానికి ప్రయత్నించారు. వారిలో ఇద్దరు విద్యార్థులు మరణించగా, పలువురికి గాయాలయ్యాయి. వారిని స్థానిక ఆస్పత్రికి తరలించి చికిత్స అందిస్తున్నారు.
కాగా సమాచారం అందుకున్న పోలీసులు ఘటనా స్థలానికి చేరుకున్నారు. కాల్పులకు తెగబడిన వ్యక్తిని పోలీసులు అరెస్ట్ చేశారు. షూటర్ వయస్సు 17 ఏండ్లు ఉంటుందనీ.. అతని వద్ద రిజిస్టర్డ్ గన్ ఉందనీ తెలిపారు. ఘటనపై పోలీసులు దర్యాప్తు చేస్తున్నారు. కాగా పాఠశాల విద్యార్థులు భవనం మీద నుంచి దూకుతున్న దృశ్యాలు సోషల్ మీడియాలో వైరల్ అవుతున్నాయి.
