పాలమూరులో వైఎస్ షర్మిల సంచలన వ్యాఖ్యలు
దిశ ప్రతినిధి, మహబూబ్‌నగర్: వైఎస్సార్ నరరూప రాక్షసుడు కాదని వైఎస్ షర్మిల అన్నారు. ఈ రాష్ట్రానికి నిజమైన నరరూప రాక్షసుడు ముమ్మాటికీ కేసీఆర్ అంటూ ఘాటు వ్యాఖ్యలు చేశారు. మంగళవారం మహబూబ్‌నగర్ జిల్లా కేంద్రంలోని ఓ ప్రైవేట్ ఫంక్షన్ హాల్‌లో నిర్వహించిన నిరుద్యోగ దీక్ష కార్యక్రమానికి ఆమె హాజరయ్యారు.
ఈ సందర్భంగా షర్మిల మాట్లాడుతూ.. జిల్లాకు చెందిన మంత్రి శ్రీనివాస్ గౌడ్ వైఎస్ రాజశేఖర్ రెడ్డిని నరరూప రాక్షసుడు అని సంబోధించారని గుర్తు చేశారు. కానీ, ప్రత్యేక రాష్ట్రం పేరుతో 1200 మందికి పైగా ప్రాణాలను బలి తీసుకుని, యువతను రెచ్చగొట్టింది టీఆర్ఎస్ నేతలే అన్నారు. తెలంగాణలో టీఆర్ఎస్ అధికారంలోకి వచ్చాక ఉద్యోగాలు భర్తీ చేయకుండా నిరుద్యోగుల జీవితాలతో ఆడుకుంటున్నది కేసీఆర్ అంటూ దుయ్యబట్టారు.
ఆఫ్ఘనిస్తాన్‌లో తాలిబన్ల పాలనలాగా.. తెలంగాణలో కేసీఆర్ పాలన సాగుతోందని షర్మిల అభివర్ణించారు. ఈ జిల్లాకు చెందిన ఒక మంత్రి భూ కబ్జాలకు పాల్పడుతుంటే.. మరో మంత్రి నిరుద్యోగులను హమాలీ పనులు చేసుకోవాలని సూచించడం సిగ్గుచేటన్నారు. టీఆర్ఎస్ నియంత పాలనకు రోజులు దగ్గరపడ్డాయని.. హుజురాబాద్‌లో అధికార పార్టీకి షాక్ ఇచ్చేందుకు ఇప్పటికే నిరుద్యోగులు సిద్ధం అయ్యారు అంటూ వైఎస్ షర్మిల హెచ్చరించారు.
