విద్యుత్ తీగలకు తగిలి కూలిన హెలికాప్టర్... ప్రాణాలతో బయటపడ్డ ఎంపీ

దిశ, వెబ్ డెస్క్: టేకాఫ్ అవుతున్న ఓ హెలికాప్టర్ విద్యుత్ తీగలకు తగిలి ప్రమాదానికి గురైంది. అందులో ఉన్న ప్రయాణికులు క్షేమంగా బయటపడ్డారు. ఇందుకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. ఇందుకు సంబంధించి ఇతర మీడియాలో వచ్చిన కథనం ప్రకారం... బ్రెజిల్ లోని మినాస్ గెరైస్ లో ఈ ఘటన చోటు చేసుకుంది. బ్రెజిల్ కు చెందిన పార్లమెంటు సభ్యుడితో సహా పలువురు ప్రజాప్రతినిధులు ఒక చోట నుంచి మరో చోటకు హెలికాప్టర్ లో బయలుదేరారు. టేకాఫ్ అవుతున్న సమయంలో హెలికాప్టర్ విద్యుత్ తీగలకు తగిలి కిందపడిపోయింది. అయితే, అందులో ఉన్నవారంతా ప్రాణాలతో బయటపడ్డారు. వెంటనే స్పందించిన రెస్క్యూ టీం వారిని ఆస్పత్రికి తరలించింది. ఇదిలా ఉంటే పైలెట్ నియంత్రణ కోల్పోవడం వల్లే ప్రమాదం చోటు చేసుకుందని అక్కడి పోలీసులు భావిస్తున్నట్లు అందులో పేర్కొన్నారు.