మోస్ట్ వాంటెడ్ వికాస్ దూబె అరెస్టు

దిశ, వెబ్‌డెస్క్ : ఉత్తరప్రదేశ్‌ మోస్ట్ వాంటెడ్ గ్యాంగ్‌స్టర్ వికాస్ దూబెను ఎట్టకేలకు యూపీ పోలీసులు అరెస్టు చేశారు. మధ్యప్రదేశ్ లోని ఉజ్జయినిలో గురువారం తెల్లవారు జామున అతన్ని పట్టుకున్నట్లు తెలుస్తోంది. ఇటీవల కాన్పూర్‌లో డీఎస్పీ సహా ముగ్గురు ఎస్సైలు, నలుగురు కానిస్టేబుళ్లు మొత్తం 8 మంది పోలీసులను వికాస్ దూబె గ్యాంగ్ హత్య చేసింది. ఈ ఘటన దేశవ్యాప్తంగా సంచలనం రేపిన విషయం తెలిసిందే. దీనిని సీరియస్‌గా తీసుకున్న యూపీ ప్రభుత్వం దూబె కోసం ప్రత్యేక టాస్క్ ఫోర్సు బృందాలను ఏర్పాటు చేసింది. హత్య అనంతరం పరారీలో ఉన్న దూబె కోసం వారం రోజులుగా పోలీసులు గాలింపు చర్యలు చేపట్టారు. ఈ క్రమంలోనే దూబె ముగ్గురు ముఖ్య అనుచరులను పోలీసులు ఎన్ కౌంటర్‌లో చంపేశారు. అయితే, యూపీ మోస్ట్ వాంటెడ్ ఉజ్జయినిలో తలదాచుకున్నాడనే సమాచారం మేరకు అతన్ని ఈరోజు పోలీసులు అరెస్టు చేశారు. దీంతో ఎన్నో ఏండ్లుగా ప్రభుత్వాల కళ్లు గప్పి తన నేర సామ్రాజ్యాన్ని విస్తరించిన దూబె కథ ముగిసినట్లే అని పలువురు చెబుతున్నారు. కాగా, ఇతనిపై ఇప్పటికే చాలా మర్డర్ కేసులు, దోపిడీ కేసులు ఉన్నాయి.