వరంగల్‌లో దారుణం.. అడిగింది ఇవ్వలేదని ముగ్గురి హత్య
దిశ, కాళోజీ జంక్షన్: ఆస్తి వాటా వివాదాల్లో సొంత తమ్ముడు అన్న కుటుంబంపై విచక్షణ రహితంగా దాడి చేశాడు. కత్తులతో నరికి ఏకంగా ముగ్గురిని హత్య చేసిన ఘటన వరంగల్ నగరంలో సంచలనం రేపుతోంది. నగరంలోని ఎల్బీనగర్ ప్రాంతంలో నివాసం ఉంటున్న చాంద్ పాషా, అతని తమ్ముడు షఫీ పరకాలలో గో మాంసం వ్యాపారం చేస్తున్నారు. అయితే, వ్యాపారంలో షఫీ ఆర్థికంగా నష్టపోగా.. అన్న చాంద్ పాషా మాత్రం స్థిరపడ్డారు. దీంతో షఫీ.. అన్న వ్యాపారంలో వాటా ఇవ్వాలని కుటుంబ సభ్యులతో తరచూ గొడవలు చేస్తున్నాడు. అందుకు వారు అంగీకరించకపోవడంతో.. బుధవారం తెల్లవారుజామున షఫీ మరో 9 మంది మిత్రులతో కలిసి ఆటోలో అన్న ఇంటికి వెళ్లాడు. వెంట తీసుకొచ్చిన కత్తులతో దాడికి పాల్పడ్డారు. ఈ ఘటనలో చాంద్ పాషా (50), ఖలీల్(40), సబీరా(42) అక్కడికక్కడే మృతి చెందగా సమర్, ఫాహాద్ తీవ్రంగా గాయపడ్డారు. వీరిని చికిత్స కోసం ఎంజీఎం ఆస్పత్రికి తరలించారు. సమాచారం అందుకున్న ఇంతజార్‌గంజ్ పోలీసులు ఘటనా స్థలానికి చేరుకున్నారు. కేసు నమోదు చేసుకుని దర్యాప్తు చేస్తున్నారు. ఇది తెలుసుకున్న జిల్లా సీపీ తరుణ్ జోషి కూడా ఘటనా స్థలానికి వచ్చి వివరాలు సేకరిస్తున్నారు.
