పుట్టినరోజు నాడే మృత్యుఒడిలోకి..

దిశ, మాచారెడ్డి: బైకు అదుపు తప్పి ఓ యువకుడు మృతి చెందిన ఘటన మాచారెడ్డి మండలం సరిహద్దులోని గంభీరావుపేట నర్మాల గ్రామ శివారులో గురువారం చోటు చేసుకుంది. వివరాల్లోకి వెళితే.. సిద్దిపేట జిల్లా దుబ్బాక మండలం పోతారం గ్రామానికి చెందిన యూనుస్(35) అనే యువకుడు మాచారెడ్డి మండలం లచ్చపేట గ్రామంలో బీడీ కార్ఖానా నిర్వహించుకుంటూ జీవనం గడుపుతున్నారు. ప్రతి రోజులాగే గురువారం సాయంత్రం కార్ఖానా నుండి ఇంటికి వెళ్తుండగా ప్రమాదవశాత్తు బైక్ అదుపుతప్పి రోడ్డుపై పడ్డాడు. ప్రమాదంలో అతనికి తీవ్ర గాయాలు కావడంతో అక్కడికక్కడే మృతి చెందాడు. పోలీసులు ఘటనా స్థలాన్ని సందర్శించి కేసు నమోదు చేసుకుని దర్యాప్తు చేస్తున్నారు.

పుట్టినరోజు నాడే మృత్యువాత..

యూనుస్ మృతి పట్ల లచ్చ పేట గ్రామంలోని బీడీ కార్మికులు విషాదంలో మునిగారు. పుట్టిన రోజు సందర్భంగా కార్మికులకు శీతలపానీయాలు పంపిణీ చేసినట్లు వారు గుర్తు చేసుకున్నారు. పుట్టినరోజునే మృత్యువు కబలించడం బాధాకరమని కార్మికులు సానుభూతి వ్యక్తం చేశారు.