కేఎఫ్‌సీ న్యూ 'చాక్లెట్ మింట్' డిప్.. సోషల్ మీడియాలో వైరల్‌
దిశ, ఫీచర్స్ : KFC ఫాస్ట్ ఫుడ్ రెస్టారెంట్స్‌లో లభించే చికెన్ స్టార్టర్స్ గురించి ప్రత్యేకంగా చెప్పనక్కర్లేదు. అయితే, రొటీన్‌కు భిన్నంగా దక్షిణ కొరియాలోని కేఎఫ్‌సీ ఫాస్ట్‌ఫుడ్ రెస్టారెంట్స్‌ చికెన్‌ను డిప్ చేసుకుని తినే కొత్త రకమైన మింట్ చాక్లెట్ డిప్‌ను పరిచయం చేశాయి. ప్రస్తుతం ఈ స్పెషల్ ఫుడ్ సోషల్ మీడియాలో వైరల్‌గా మారింది.
దక్షిణ కొరియన్లు ప్రస్తుతం 'మింట్ చాక్లెట్' రుచికి ఫిదా అయిపోతున్నారు. దీంతో పలు స్థానిక కంపెనీలు ఈ ట్రెండ్‌ను క్యాష్ చేసుకునేందుకు ప్రయత్నిస్తున్నాయి. 'స్టార్‌బక్స్ కొరియా, హైటై కన్‌ఫెక్షనరీ, ఫుడ్స్ లేదా ఓరియన్' వంటి ప్రధాన కంపెనీలు తమ లైనప్స్‌కు పుదీనా చాక్లెట్ ఫ్లేవర్ ప్రొడక్ట్స్ జోడించాయి. తాజాగా ఈ జాబితాలో ఫాస్ట్ ఫుడ్ దిగ్గజం కేఎఫ్‌సీ కూడా చేరింది.
లోకల్ ఫుడ్ డెలివరీ యాప్ 'బేమిన్'తో కలిసి మింట్ చాక్లె్ట్ ఫ్లేవర్ డిప్‌ను రూపొందించింది కేఎఫ్‌సీ. ఇది ఆగస్టు 8 వరకు KFC బ్రాంచెస్‌లో అందుబాటులో ఉంటుందని పేర్కొంది. దీంతో ఈ రుచిని ఆస్వాదించేందుకు ప్రజలు ప్రయత్నిస్తుండగా.. ఇప్పటికే రుచి చూసినవారిలో చాలా మంది టూత్‌పేస్ట్ మాదిరిగా ఉందని విమర్శిస్తున్నారు. ఏదేమైనా మింటీ డిప్ ఒక్కో టబ్‌కు 900 కొరియన్ వోన్($0.70) ధర నిర్ణయించగా.. ఇది వివిధ కాంబో మీల్స్‌లో భాగంగా అందుబాటులో ఉంది.
'KFC ప్రసిద్ధ చికెన్, బర్గర్స్‌తో కూడిన బేమిన్ మింట్ చాక్లెట్ డిప్‌తో సరికొత్త అనుభవాన్ని పొందగలరని ఆశిస్తున్నాము' అని కేఎఫ్‌సీ దక్షిణ కొరియా అధికారి తెలిపారు.
