కాంగ్రెస్ హైకమాండే.. కేసీఆర్‌కు అసలైన కోవర్ట్: NVSS ప్రభాకర్ కీలక వ్యాఖ్యలు

దిశ, తెలంగాణ బ్యూరో: రాష్ట్రంలో కాంగ్రెస్‌ను డౌన్ చేసి బలపడాలని బీజేపీ అనుకోవడం లేదని, ప్రజల మనస్సు గెలుచుకోవడం ద్వారా పవర్‌లోకి వస్తామని బీజేపీ రాష్ట్ర ఉపాధ్యక్షుడు ఎన్వీఎస్ఎస్ ప్రభాకర్ అన్నారు. సోమవారం బీజేపీ రాష్ట్ర కార్యాలయంలో ఆయన మీడియాతో మాట్లాడారు. కేసీఆర్‌ను ఓడించాలనుకునే కాంగ్రెస్ నేతలకు బీజేపీ సాదర స్వాగతం పలుకుతుందన్నారు. కాంగ్రెస్ హైకమాండే.. కేసీఆర్‌కు అసల‌సిసలైన కోవర్ట్ అని ఆరోపించారు. అవినీతికి పాల్పడిన నేతలకు ప్రగతి భవన్ అడ్డాగా మారిందని విమర్శించారు.

అధికార దుర్వినియోగానికి పాల్పడుతున్న సీఎం కార్యాలయాన్ని సీజ్ చేయాలని, అవినీతిపరులకు రక్షణగా మారిన ప్రగతి భవన్‌పై విచారణ జరపాలని హైకోర్టు ప్రధాన న్యాయమూర్తికి విజ్ఞప్తి చేశారు. విచారణకు ముందు కవిత, రోహిత్ రెడ్డిలు ప్రగతి భవన్ ఎందుకు వెళ్ళారు? అని ప్రశ్నించారు. ఉద్యమ సమయంలో ప్రజల జీవితాల్లో కాంగ్రెస్ పార్టీ చెలగాటం ఆడిందని మండిపడ్డారు. రాహుల్ భారత్ జోడో యాత్రతో తెలంగాణలో కాంగ్రెస్ ఖతమైందని, కాంగ్రెస్ పార్టీని కనీసం జోడో చేయలేని నాయకుడు రాహుల్ గాంధీ అని విమర్శించారు.