VC.Sajjanar: పెళ్లి పేరుతో న్యూడ్ వీడియో కాల్స్.. 'X'లో వీసీ సజ్జనార్ పోస్ట్
దిశ, డైనమిక్ బ్యూరో: మ్యాట్రి 'మనీ' మోసాలతో తస్మాత్ జాగ్రత్త అంటూ (TGSRTC) టీజీఎస్ఆర్టీసీ ఎండీ వీసీ సజ్జనార్ (VC.Sajjanar) పేర్కొన్నారు. యువతను అలర్ట్ చేస్తూ ‘ఎక్స్’ వేదికగా ఆయన ఇవాళ ఓ వీడియో పోస్ట్ చేశారు. మ్యాట్రిమోని సైట్ల కేంద్రంగా ఈ మధ్య మోసాలు పెరిగిపోతున్నాయని ఆయన వెల్లడించారు. మ్యాట్రిమోని (matrimony) సైట్లలో అందమైన యువతీయువతుల ఫొటోలతో నకిలీ (Fake Profile) ప్రొఫైల్స్ కేటుగాళ్ళు క్రియేట్ చేస్తున్నారని తెలిపారు. పెళ్లి పేరుతో మాయమాటలు చెప్పి న్యూడ్ వీడియో కాల్స్ చేస్తారని పేర్కొన్నారు. న్యూడ్ వీడియోలతో బ్లాక్ మెయిలింగ్ చేస్తూ అడిగిన డబ్బు ఇవ్వాలని బెదిరింపునకు దిగుతారని సూచించారు.
న్యూడ్ వీడియోల వ్యవహారం బయటకు వస్తే పరువు పోతుందనే భయంతో బాధితులు ఫిర్యాదుకు జంకుతున్నారని తెలిపారు. మ్యాట్రిమోనీ వెబ్‌సైట్లలో పరిచయమైన యువతి, యువకుల పట్ల అప్రమత్తంగా ఉండాలని సూచించారు. వీడియో కాల్స్ చేయమన్నా, న్యూడ్ ఫోటోలు అడిగిన కచ్చితంగా అనుమానించాల్సిందేనని హెచ్చరించారు. మోసానికి గురైతే ఏమాత్రం ఆలస్యం చేయకుండా 1930 నంబరుకు ఫోన్‌ చేసి ఫిర్యాదు చేయాలని సూచనలు చేశారు. కాగా, తన స్నేహితురాలికి జరిగిన ఘటన ఆధారంగా ఓ యువతి మ్యాట్రిమోనీ మోసలపై యువతకు అవగాహన కల్పిస్తూ ఓ వీడియో చేసింది. ఈ నేపథ్యంలోనే సజ్జనార్ ఎక్స్ ఖాతా ద్వారా యువతను అలర్ట్ చేస్తూ ఆ వీడియో నెటిజన్లతో పంచుకున్నారు.
