సిర్పూర్‌లో ఇల్లు కొన్నా.. గృహప్రవేశానికి అందరూ రండి.. ఆర్ఎస్పీ పిలుపు
దిశ, డైనమిక్ బ్యూరో: ఎట్టకేలకు సిర్పూర్ గడ్డ మీద చిన్న ఇల్లు కొనుక్కున్నామని సోషల్ మీడియా వేదికగా బీఎస్పీ స్టేట్ చీఫ్ ఆర్ఎస్ ప్రవీణ్ కుమార్ వెల్లడించారు. తమ ఇంటి నంబరు, 3-8 కోసిని గ్రామ పంచాయితిలో పేర్కొన్నారు. ‘నిజానికి తెలంగాణ మొత్తంతో నా ప్రస్థానం ముడిపడినప్పటికీ, మీ శేష జీవితం మా వద్దే గడపండి అని నన్ను అక్కున చేర్చుకున్న సిర్పూర్ నియోజకవర్గ ప్రజలకు ఏం చేసినా తక్కువే. ఈ ప్రాంత ప్రజలందరికీ నా హృదయపూర్వక పాదాభివందనాలు. చివరి శ్వాస వరకూ మీ మధ్యనే ఉంటానని, మీ కోసమే శ్రమిస్తానని మాటిస్తున్నా.’ అని తెలిపారు. ఎన్నికల్లో ఇక ఎవరు లోకల్- ఎవరు నాన్ లోకల్ నిర్ణయించాల్సింది సిర్పూరు ప్రజలేనని వెల్లడించారు. ఈ నెల 29 నాడు ఉదయం 11 గంటలకు మహనీయుల సాక్షిగా గృహప్రవేశం ఉంటుందని, సిర్పూరు విముక్తి కోరుకునే అందరికీ ఇదే మా మా ఆహ్వానం అంటూ పిలుపునిచ్చారు. మరోవైపు సిర్పూర్ బీఆర్ఎస్ ఎమ్మెల్యే కోనేరు కోనప్పకు ట్వీట్ ట్యాగ్ చేశారు.
