నత్తనడకన పాఠశాల భవన నిర్మాణ పనులు..
దిశ, పెద్దేముల్ : పెద్దేముల్ మండలంలోని ఎర్రగడ్డ తండా (అత్కూర్ తండా) గ్రామంలో నూతనంగా నిర్మిస్తున్న ప్రాథమిక పాఠశాల భవనం నిర్మాణం పనులు నత్త నడకగా సాగుతున్నాయి. పాత పాఠశాల భవనం మరమ్మతులకు గురి కావడంతో నూతన భవనం నిర్మించేందుకు గత ప్రభుత్వం నిధులు మంజూరు చేసింది. పనులు ప్రారంభించిన సదరు కాంట్రాక్టర్ ఏండ్లు గడుస్తున్నా నేటికి పూర్తి చేయకపోవడంతో పాఠశాల భవనం నిర్మాణం పనులు బేస్మెంట్, పిల్లార్ల వరకే నిలిచిపోయింది. ఎర్రగడ్డ తండా (అత్కూరు తండా) ప్రాథమిక పాఠశాల భవనం నిర్మాణం పనుల్లో జాప్యం జరగడటంతో విద్యార్థులు, ఉపాధ్యాయులు అవస్థలు పడుతున్నారు.
ప్రస్తుతం ఆత్కూర్ తండా (ఎర్రగడ్డ తండా) లో ఉన్న ఓ పురాతన కమిటి హాల్ భవనంలో విద్యార్థులకు తాత్కాలికంగా పాఠాలు బోధిస్తున్నారు. పాఠశాల భవనం మరమ్మతులకు గురి కావడంతో నాడు ఉన్నతాధికారులు స్పందించి నూతన భవనం నిర్మించేందుకు సుమారు 30 లక్షలు నిధులు మంజూరు చేసిందని, కాంట్రాక్టర్ నిర్లక్ష్య ధోరణా..? లేక మరేదైనా కారణమో గాని పాఠశాల పనులు మాత్రం బెస్మిట్, పిల్లర్ల వరకే నిలిచిపోవడంతో విద్యార్థులు విద్యనభ్యసించడానికి తీవ్ర ఇబ్బందులు పడుతున్నారు. ఇప్పటికైనా ఉన్నతాధికారులు స్పందించి నిలిచిపోయిన ప్రాథమిక పాఠశాల భవనం నిర్మాణం పనులు ముందుకు సాగేలా చూడాలని విద్యార్థుల తల్లిదండ్రులు, గ్రామస్తులు కోరుతున్నారు.
పది లక్షలు ఖర్చు చేసినా ఒక్క రూపాయి రాలేదు : కాంట్రాక్టర్
నూతన పాఠశాల భవనం నిర్మాణం పనులు చేపట్టడానికి నాటి ప్రభుత్వం 30 లక్షలు కేటాయించింది. బేస్మెంట్, పిల్లర్స్ వరకు 10 లక్షలు ఖర్చు చేసినా.. ఇప్పటిదాకా ఒక్క రూపాయి బిల్లు రాలేదు. అందుకే పెట్టుబడికి పైసలు లేకపోవడంతో చెసేదేమిలేక పాఠశాల భవన నిర్మాణ పనులు ఆపేసిన అని సదరు కాంట్రాక్టర్ వెల్లడించారు. ఇప్పటికైనా ప్రజాప్రతినిధులు, ఉన్నతాధికారులు స్పందించి పాఠశాల భవన నిర్మాణ పనులు ముందుకు సాగడానికి నిధులను మంజూరు చేయాలని కాంట్రాక్టర్ సురేష్ కోరుతున్నారు.
