ప్రియాంకాగాంధీ తెలంగాణ టూర్ డేట్ ఫిక్స్.. షెడ్యూల్ ఇదే..!
దిశ, తెలంగాణ బ్యూరో : కాంగ్రెస్ అగ్రనేత ప్రియాంకా గాంధీ హైదరాబాద్ పర్యటన దాదాపుగా ఖరారైంది. ఈ నెల 8వ తేదీన సరూర్ నగర్ స్టేడియంలో జరిగే బహిరంగసభలో పాల్గొంటున్నారు. రాష్ట్ర పార్టీ వ్యవహారాల ఇన్‌చార్జి థాక్రే రాష్ట్ర రాజకీయ వ్యవహారాల కమిటీ నేతలతో మంగళవారం నిర్వహించిన జూమ్ సమావేశంలో ఈ నిర్ణయాన్ని ప్రకటించారు. నగర పర్యటనలో భాగంగా ఆ రోజు ఎల్బీనగర్‌లోని శ్రీకాంతాచారి విగ్రహానికి ప్రియాంక నివాళులర్పించి అక్కడి నుంచి రెండున్నర కి.మీ. మేర సరూర్‌నగర్ వరకు పాదయాత్ర నిర్వహించేలా ప్రోగ్రామ్ ఖరారైంది.
పాదయాత్ర, మిగిలిన కార్యక్రమాల్లో ఆమె పాల్గొనడంపై సాయంత్రానికి నిర్దిష్టమైన ప్రోగ్రామ్‌ను రాష్ట్ర కాంగ్రెస్ నేతలు ఖరారు చేయనున్నారు. మాణిక్‌రావు థాక్రే అధ్యక్షతన జరిగిన రాష్ట్ర కాంగ్రెస్ పీఏసీ సమావేశంలో పీసీసీ చీఫ్ రేవంత్‌రెడ్డి సహా సీఎల్పీ నేత భట్టి విక్రమార్క, వర్కింగ్ ప్రెసిడెంట్‌లు మహేశ్‌కుమార్ గౌడ్, జగ్గారెడ్డి, అంజన్ కుమార్ యాదవ్, ఎంపీలు ఉత్తమ్ కుమార్ రెడ్డి, కోమటిరెడ్డి వెంకటరెడ్డి, ప్రచార కమిటీ ఛైర్మన్ మధుయాష్కీ, ఏఐసీసీ కార్యదర్శులు దుద్దిళ్ళ శ్రీధర్ బాబు, రోహిత్ చౌదరి, సంపత్ కుమార్, పీసీసీ మాజీ ప్రెసిడెంట్ పొన్నాల లక్ష్మయ్య, సీనియర్ నాయకులు వీహెచ్, మాజీ మంత్రులు షబ్బీర్ ఆలీ, బలరాంనాయక్ తదితరులు ఈ మీటింగ్‌లో పాల్గొన్నారు.
