నిఖత్ జరీన్ తెలంగాణ ఖ్యాతిని మరింత చాటాలి : ప్రశాంత్ రెడ్డి

దిశ ప్రతినిధి, నిజామాబాద్: నిఖత్ జరీన్ భవిష్యత్ లో మరిన్ని విజయాలు సాధించి తెలంగాణ ఖ్యాతిని మరింత చాటాలని ఆర్ అండ్ బీ శాఖ మంత్రి వేముల ప్రశాంత్ రెడ్డి కాంక్షించారు. కామన్వెల్త్‌ గేమ్స్‌లో స్వర్ణం, ప్రపంచ చాంపియన్‌షిప్‌ టైటిల్‌ చేజిక్కించుకున్న నిజామాబాద్ బిడ్డ బాక్సర్ నిఖత్‌ జరీన్‌.. తాజాగా మధ్యప్రదేశ్ బోపాల్‌లో జరిగిన 6వ జాతీయ ఎలైట్‌ మహిళల బాక్సింగ్‌ చాంపియన్‌షిప్‌ టైటిల్ నెగ్గడం పట్ల మంత్రి హర్షం వ్యక్తం చేశారు. సోమవారం జరిగిన తుదిపోరులో రైల్వేస్‌ (RSPB) బాక్సర్‌ అనామికతో తలపడి విజయం నమోదు చేసింది. 50 కేజీల మహిళల ఫైనల్లో నిఖత్‌ 4-1 తో రైల్వేస్‌ బాక్సర్‌ అనామికపై గెలుపొందింది. పోరు ఆరంభం నుంచే వరుస పంచ్‌లతో విరుచుకుపడిన నిఖత్‌కు, అనామిక కనీసం పోటీనివ్వలేకపోయింది. నిజామాబాద్ గడ్డ కీర్తి ప్రతిష్టలు, తెలంగాణ రాష్ట్ర గౌరవాన్ని చిరస్థాయిలో నిలిచిపోయేలా తన ప్రతిభను కనబరుస్తున్న నిఖత్ జరీన్‌కు మంత్రి వేముల శుభాకాంక్షలు, అభినందనలు తెలిపారు.