హైదరాబాద్‌లో కొత్త వేరియంట్.. దేశంలోనే తొలి కేసు నమోదు
దిశ, తెలంగాణ బ్యూరో: హైదరాబాద్సిటీలో నివసించే ఓ వృద్ధుడు(80) కి కరోనా బీఏ 5 కొత్త వేరియంట్ సోకింది. దేశంలోనే తొలి కేసు ఇక్కడ నమోదైనట్లు ఆరోగ్యశాఖ స్పష్టం చేసింది. అయితే ప్రస్తుతం అతని ఆరోగ్యం నిలకడగా ఉన్నదని, హోం ఐసోలేషన్‌లో చికిత్స పొందుతున్నట్లు హెల్త్ డైరెక్టర్డాక్టర్ జీ.శ్రీనివాసరావు పేర్కొన్నారు. న్యాయ సలహాదారుడిగా పనిచేస్తున్న అతనికి ఎలాంటి ట్రావెల్ హిస్టరీ లేదన్నారు. కరోనా లక్షణాలు ఉండడంతో ఈ నెల 12న అతను టెస్ట్ చేయించుకున్నాడని, ఆర్టీపీసీఆర్ టెస్టులో పాజిటివ్ వచ్చిందన్నారు. అతని ప్రైమరీ కాంటాక్టులను ఇద్దరికీ ఆర్టీపీసీఆర్ టెస్టులు చేశామన్నారు. రిపోర్టులు రావాల్సి ఉన్నదన్నారు. బీఏ4, బీఏ 5 వేరియంట్లు ఒమిక్రాన్‌కు సబ్‌ వేరియంట్లు అని, ఇవి ఒమిక్రాన్ కంటే ప్రమాదకరం కాదని తేల్చేశారు. కానీ మిగతా వాటితో పోల్చితే వీటికి వ్యాపించే గుణం ఎక్కువగా ఉండటం వలన కాస్త గందరగోళ పరిస్థితులు నెలకొన్నాయన్నారు. దీంతో ఫోర్ట్ వేవ్ వస్తుందనుకోవడం లేదనే అభిప్రాయాన్ని వ్యక్తం చేశారు.
పది రోజుల నుంచి ప్రతీ శాంపిల్‌ను..
గడిచిన పది రోజుల నుంచి ఆర్టీపీసీఆర్ విధానంలో సేకరించిన ప్రతీ శాంపిల్‌ను జీనోమ్ సీక్వెన్సింగ్‌కు పంపిస్తున్నామని డీహెచ్ తెలిపారు. అందులో భాగంగానే హైదరాబాద్‌లోని వృద్ధుడికి బీఏ 5 తేలినట్లు వెల్లడించారు. ప్రస్తుతానికి పరిస్థితి పూర్తి అదుపులోనే ఉన్నదని, ప్రజలెవ్వరూ టెన్షన్పడాల్సిన అవసరం లేదని ఆయన నొక్కి చెప్పారు.
