కైత్లాపూర్ టూ హైటెక్సిటి రోడ్డు విస్తరణ పనులు పూర్తి చేయాలి : ఎమ్మెల్యే
దిశ, కూకట్పల్లి : కైత్లాపూర్ నుంచి హైటెక్ సిటి వెళ్లే రోడ్డును వంద ఫీట్లుగా విస్తరణ పనులు వెంటనే ప్రారంభించాలని ఎమ్మెల్యే మాధవరం కృష్ణారావు అన్నారు. శనివారం ఎమ్మెల్యే మాధవరం కృష్ణారావు జీహెచ్ఎంసీ, ట్రాఫిక్ పోలీస్ అధికారులతో కైత్లాపూర్ నుంచి హైటెక్ సిటీ వెళ్లే రోడ్డును పరిశీలించారు. ఈ సందర్బంగా ఎమ్మెల్యే మాధవరం కృష్ణారావు మాట్లాడుతూ కూకట్పల్లిలో ట్రాఫిక్ సమస్యను పరిష్కరించేందుకు కైత్లాపూర్ నుంచి హైటెక్ సిటీ వైపు వెళ్లే దారిని వంద ఫీట్ల రోడ్డు ఏర్పాటు చేసేందుకు బీఆర్ఎస్ ప్రభుత్వ హయాంలో పది కోట్ల రూపాయలు నిధులు మంజూరు చేయడంతో పాటు రోడ్డు కొరకు మఠం వారిని ఒప్పించి భూమిని సైతం జీహెచ్ఎంసీకి విరాళంగా అందించేలా చర్యలు తీసుకున్నామని అన్నారు.
వంద ఫీట్ల రోడ్డును ఏర్పాటు చేస్తే ట్రాఫిక్ సమస్య పరిష్కారం అవుతుందని అన్నారు. రోడ్డు విస్తరణ పనులు ఐడీఎల్ అధికారులు అడ్డుకుంటున్నారని వారితో మాట్లాడి సమస్యను పరిష్కరించి అధికారులు రోడ్డు పనులను వెంటనే ప్రారంభించాలని కోరారు. ఈ కార్యక్రమంలో కార్పొరేటర్లు సబీహ బేగం, మాజీ కార్పొరేటర్ బాబురావు, జిల్లా మైనార్టీ విభాగం అధ్యక్షుడు గౌసుద్దిన్ తదితరులు పాల్గొన్నారు.
