పెద్ద జీతగాడిలా పనిచేస్తా మేఘా మార్క్ చూపిస్తాం

దిశ,వనపర్తి : వనపర్తి నియోజకవర్గం అభివృద్ధి కోసం తాను పెద్ద జీతగాడిలా అహర్నిశలు పనిచేసి నియోజకవర్గ అభివృద్ధిలో మెఘా మార్కును చూపిస్తానని వనపర్తి ఎమ్మెల్యే తూడి మేఘారెడ్డి అన్నారు. మంగళవారం వనపర్తి జిల్లా కేంద్రంలోని క్యాంపు కార్యాలయంలో ఎమ్మెల్యే తూడి మేఘా రెడ్డి 473 మంది లబ్ధిదారులకు రూ.1,12,47,500 సీఎం సహాయనిధి చెక్కులను, 215 మంది లబ్ధిదారులకు 2,15,24,940 కళ్యాణ లక్ష్మి ,షాది ముబారక్ చెక్కులను లబ్ధిదారులకు పంపిణీ చేశారు.ఈ సందర్భంగా ఆయన మాట్లాడుతూ.. కాంగ్రెస్ ప్రభుత్వం ప్రకటించిన మహిళలకు ఉచిత బస్సు ప్రయాణం,10 లక్షల విలువ గల ఆరోగ్య శ్రీ పథకం, 200 యూనిట్ల విద్యుత్ ఉచితం, 500 కే వంట గ్యాస్ సిలిండర్ల పంపిణీ,రైతు రుణమాఫీ పథకాలు అమలుచేస్తున్నామన్నారు.ఇటీవల ముగిసిన క్యాబినెట్ సమావేశంలో వ్యవసాయోగ్యమైన సాగుభూమికి ప్రతి ఎకరాకు, భూమి లేని నిరుపేదలకు సైతం ఎకరాకు రూ. 12 వేలుచొప్పున అందజేయనున్నామన్నారు.

మహిళలను ఐదు సంవత్సరాలలో కోటి మంది మహిళలను కోటీశ్వరులు చేయాలన్న లక్ష్యంతో కాంగ్రెస్ ప్రభుత్వం పని చేస్తుందన్నారు. ఈ క్రమంలోనే ఆర్టీసీ బస్సుల కొనుగోల్ల లోను,విద్యార్థులకు బట్టలు కుట్టడంలోనూ,ప్రభుత్వ పాఠశాల వంట చేసే,డ్రెస్ లను కుట్టే కార్యక్రమాలను మహిళలను భాగస్వామ్యం చేస్తున్నామన్నారు. వనపర్తి నియోజకవర్గంలో ఇప్పటికే రూ.673 కోట్లలతో అభివృద్ధి కార్యక్రమాలు చేపట్టినట్లు తెలిపారు. వనపర్తి జిల్లా కేంద్రంలో ఇప్పటికీ సొంతభవనాలు లేని ప్రభుత్వ కార్యాలయాలు,గురుకుల పాఠశాలలు,కళాశాలలకు సొంతభవనాలు నిర్మిస్తామన్నారు. ఎన్నికల సమయంలో చెప్పినట్లుగానే తాను నిజాయితీగా నికార్సైన నాయకుడిగా పని చేస్తానని, తప్పు చేస్తే చూపించాలని తలవంచుకొని పనిచేస్తానన్నారు. రానున్న స్థానిక సంస్థల ఎన్నికల్లో కాంగ్రెస్ పార్టీ నుంచి బలపరిచే అభ్యర్థులను భారీ మెజారిటీతో గెలిపించాలని, ఇతర వారికి అవకాశం ఇస్తే అభివృద్ధికి ఆటంకం కలుగుతుందన్నారు. దీనిని దృష్టిలో ఉంచుకొని కాంగ్రెస్ పార్టీ కార్యకర్తలు నాయకులు మన అభ్యర్థులను గెలిపించేందుకే కృషి చేయాలని సూచించారు.ఈ కార్యక్రమంలో మున్సిపల్ చైర్మన్ మహేష్,వైస్ చైర్మన్ కృష్ణ,కాంగ్రెస్ నాయకులు సత్య శీల రెడ్డి,అక్కి శ్రీనివాస్ గౌడ్,రంజిత్ కుమార్,కౌన్సిలర్ లు,వనపర్తి పట్టణ, మండలాల కాంగ్రెస్ పార్టీ నాయకులు, కార్యకర్తలు మహిళలు తదితరులు పెద్ద ఎత్తున పాల్గొన్నారు.