అభిమానుల అత్యుత్సాహం.. ఆశావహుల్లో రగులుతున్న కోపం..
దిశ, దమ్మపేట : రాష్ట్రంలో అసెంబ్లీ ఎన్నికలు సమీపిస్తున్న వేళ తెలంగాణప్రదేశ్ కాంగ్రెస్ పార్టీ ఇప్పటికే రాష్ట్రంలో పోటీ చేయనున్న 100 నియోజికవర్గాల టిక్కెట్లును కేటాయించినప్పటికీ, మిగిలిన 19 సీట్లు కేటాయించడంలో సందిగ్ధత నెలకొంది. అయితే గత వారం రోజులుగా నేడు, రేపు అంటూ మూడవ లిస్ట్ వస్తుందని వార్తలు వినిపిస్తున్నప్పటికీ ఇప్పటివరకు ఎలాంటి లిస్టు విడుదల కాలేదు. దీంతో అశ్వారావుపేట నియోజకవర్గ టికెట్ ను కూడా కాంగ్రెస్ పార్టీ ఇప్పటివరకు ప్రకటించకపోవడంతో ఆశావాహల్లో టెన్షన్ నెలకొంది. అయితే సోమవారం కాంగ్రెస్ పార్టీ ఆశావాహుడు జారే ఆదినారాయణ అభిమానులు దమ్మపేటలో అత్యుత్సాహం ప్రదర్శించారు.
అశ్వారావుపేట నియోజకవర్గ కాంగ్రెస్ పార్టీ టికెట్ జారే ఆదినారాయణ కు వచ్చేసింది అని, తమకు గాంధీభవన్ నుండి కూడా సమాచారం వచ్చిందంటూ ఏకంగా జారే ఆదినారాయణకు సంబంధించిన భారీ ప్రచార వాహనాన్ని దమ్మపేట ప్రధాన కూడలిలో నిలిపివేసి బాణాసంచా కాల్చుతూ, సంబరాలు చేసుకున్నారు. అయితే సంబరాలు చేయడంలో ఎవరికీ ఎటువంటి ఇబ్బంది లేకపోయినప్పటికీ నియోజకవర్గ కాంగ్రెస్ పార్టీ టికెట్ ఆశిస్తున్నా మిగతా ఆశావాహులు ఆ సంబరాలు చూసి అవమాన భారంగా భావిస్తూ, పొంగులేటి అనుచరులపై తీవ్ర అసహనాన్ని వ్యక్తం చేశారు. నియోజకవర్గంలో ఎవరికి టికెట్ వచ్చిన తామందరం కలిసే పనిచేయాలని భావిస్తున్నప్పటికీ, సదరు నాయకుని అనుచరులు మాత్రం అంతా తామే నడిపిస్తూ, కాంగ్రెస్ పార్టీలో ఉన్న సీనియర్లను కలుపుకొనిపోకుండా, పట్టించుకోకుండా ఒంటెద్దు పోకడలుపోతూ కార్యకర్తల మనోభావాలను దెబ్బతీసే విధంగా అనుచరుల ఆర్భాటాలు ఉన్నాయి అంటూ కాంగ్రెస్ ఆశావాహులు అసహనం వ్యక్తం చేస్తుండడం గమనార్హం.
