Shock to BRS: కోరుట్ల బీఆర్ఎస్‌కుచుక్కెదురు.. కాంగ్రెస్‌లోకి మున్సిపల్ చైర్పర్సన్‌తో సహా 6 గురు కౌన్సిలర్లు
దిశ,కోరుట్ల టౌన్: కోరుట్లలో బీఆర్ఎస్ పార్టీకి చుక్కెదురైంది. 6 మంది మున్సిపల్ కౌన్సిలర్లతో సహా కోరుట్ల మున్సిపల్ చైర్పర్సన్ అన్నం లావణ్య అనిల్ గౌడ్ కాంగ్రెస్ పార్టీ రాష్ట్ర వ్యవహారాల ఇంచార్జీ దీప దాస్ మున్సి , కోరుట్ల నియోజకవర్గం ఇంచార్జి జువ్వాడి నర్సింగరావు సమక్షంలో కాంగ్రెస్ పార్టీలో చేరారు. దీంతో రానున్న మున్సిపల్ ఎన్నికల ముందే కోరుట్ల మున్సిపల్ కాంగ్రెస్ పార్టీ కైవసం చేసుకున్నట్లైంది. చైర్ పర్సన్ అన్నం లావణ్య - అనిల్ తో పాటు కౌన్సిలర్లు జిందం లక్ష్మి నారాయణ, బద్ది సుజాత, గంధం గంగాధర్, యటం పద్మ, సజ్జు, ఫర్హాత్ బేగం, బీఆర్ఎస్ పార్టీ పట్టణ అధ్యక్షుడు అన్నం అనిల్ గౌడ్ లు బీఆర్ఎస్ పార్టీ వీడి గాంధీభవన్ లో జరిగిన కార్యక్రమంలో కాంగ్రెస్ పార్టీ కండువా కప్పుకున్నారు. పార్టీలో చేరిన మున్సిపల్ కౌన్సిలర్ మాట్లాడుతూ కాంగ్రెస్ పార్టీ ప్రవేశ పెడుతున్న ప్రజా సంక్షేమ పథకాల పట్ల ఆకర్షితులై పార్టీలో చేరుతున్నట్లు పేర్కొన్నారు. కాంగ్రెస్ పార్టీ అధికారం చేపట్టిన ఆదిలోనే మెజార్టీ కౌన్సిలర్లు బీఆర్ఎస్ పార్టీని వీడగా తాజాగా శుక్రవారం మున్సిపల్ చైర్ పర్సన్ , కౌన్సిలర్ల చేరికతో కాంగ్రెస్ లో మరింత జోష్ పెరిగింది.
