ఇంట్లో దొంగతనానికి పాల్పడిన తల్లి, కొడుకుల అరెస్ట్​

దిశ, చార్మినార్​ : చేసిన అప్పు తీర్చుకోవడానికి పనిచేస్తున్న ఇంట్లోనే దోపిడీకి పాల్పడి తప్పించుకు తిరుగుతున్న తల్లీకొడుకులను రెయిన్​ బజార్​ పోలీసులు అదుపులోకి తీసుకుని శుక్రవారం రిమాండ్​కు తరలించారు. వారి వద్ద నుంచి 16 తులాల బంగారు ఆభరణాలతో పాటు ఒక లక్ష రూపాయల నగదును పోలీసులు స్వాధీనం చేసుకున్నారు. మీర్​చౌక్ డివిజన్​​ ఏసీపీ కార్యాలయంలో శుక్రవారం సాయంత్రం జరిగిన మీడియా సమావేశంలో మీర్​ చౌక్​ డివిజన్​ ఏసీపీ వెంకటేశ్వర్​ రావు వివరాలు వెల్లడించారు. పాతబస్తీ నాగబౌలి కోట్ల అహశాన్​ ఉల్లాఖాన్​ ప్రాంతానికి చెందిన సయ్యద్​ మజీరుద్దీన్​ ఈ నెల 1వ తేదీన ఉదయం 9.30 గంటల ప్రాంతంలో అంత్యక్రియల నిమిత్తం నల్గొండ కు తరలి వెళ్ళాడు. ఈ నెల 2వ తేదీన ఉదయం 10గంటలకు ఇంట్లోని బీరువా తెరిచి ఉందని తన బావమరిది కొడుకు నుంచి మజీరుద్దీన్​ కాల్​ కు వచ్చింది. వెంటనే ఇంట్లోకి వెళ్ళి చూడగా పెద్ద ఎత్తున బంగారంతో పాటు నగదును దోచుకెళ్ళినట్లు మజరుద్దీన్​ రెయిన్​బజార్​ పోలీసులకు ఫిర్యాదు చేశాడు.

దీంతో అతని ఇంట్లోనే కొంత కాలంగా పనిచేస్తున్న యాకుత్​పురా కు చెందిన షేక్​ జరీనా (45) పనిమనిషిగా చేరింది. అమెను పోలీసులు విచారించగా అసలు విషయం వెలుగులోకి వచ్చింది. తన యజమాని ఇంట్లో బీరువాలో పెద్ద ఎత్తున బంగారం ఉన్నట్లు తన కుమారుడు షేక్​ ఇర్షాద్ (22)​కు చెప్పింది. దీంతో వారిద్దరూ యజమాని ఇంట్లో దొంగతనం చేయాలని, ఆ సొత్తుతో తన అప్పులు తీర్చుకోవాలని పథకం పన్నారు. ఈ నేపధ్యంలోనే ఇంటి యజమాని నల్గొండ కు వెళ్ళడాన్ని ఇదే అదనుగా తల్లీ కొడుకులు భావించారు. ఈ నెల 1వ తేదీన రాత్రి 11గంటలకు షేక్​ ఇర్షాద్​ శ్మశాన వాటిక నుంచి ఇంటి వెనుక ఉన్న వెంటిలేషన్​ను తొలగించి ఇంట్లోకి ప్రవేశించాడు. బంగారంతో పాటు ఒక లక్ష రూపాయల నగదును దొంగిలించి పరారయ్యాడు. దీంతో తల్లి కొడుకులను రెయిన్​ బజార్​ పోలీసులు అదుపులోకి తీసుకుని శుక్రవారం రిమాండ్​ కు తరలించారు. ఈ సమావేశంలో రెయిన్​ బజార్​ ఇన్​స్పెక్టర్​ ఎల్​.రమేష్​ నాయక్​, అడిషనల్​ ఇన్​స్పెక్టర్​ వి.మదన్​ మోహన్​ తదితరులు పాల్గొన్నారు.