రాష్ట్రంలో పెరిగిన చలి

దిశ, తెలంగాణ బ్యూరో : తెలంగాణ రాష్ట్రంలో చలి వాతావరణం మరో సారి పెరిగింది. నిన్న, ఈ రోజు, రేపు మూడు రోజుల వరకు కూడా రాష్ట్రంలో పొడి వాతావరణం ఏర్పడే అవకాశం వుందని, దీని కారణంగా ఈ మూడు రోజులు కూడా రాత్రి ఉష్ణోగ్రతలు మళ్లీ 6 డిగ్రీలకు చేరుతాయని హైదరాబాద్ వాతావరణ కేంద్రం సంచాలకులు ఆదివారం ఒక ప్రకటనలో తెలిపారు. కాగ రాబోయే 3 రోజులు రాష్ట్రంలో ఆదిలాబాద్ , కొమరంభీమ్ ఆసిఫాబాద్, నిర్మల్, మెదక్ ​జిల్లాతో పాటు మరి కొన్ని జిల్లాల్లో అత్యల్పంగానే ఉష్ణోగ్రతలు నమోదు కానున్నట్లు వెల్లడించింది. ఫలితంగా అక్కడక్కడ ఉదయం వేళల్లో పొగమంచు ఏర్పడే అవకాశం ఉందని పేర్కొంది. పొగమంచు నేపథ్యంలో ఈ 3 రోజులలో కనిష్ట ఉష్ణోగ్రతలు సాధారణం కంటే 2 నుండి 4 డిగ్రీలు తక్కువగా నమోదు అయ్యే అవకాశం వుందని వాతావరణ శాఖ వెల్లడించింది. నిన్న ఆదివారం నాడు ఆదిలాబాద్ నిర్మల్​తదితర జిల్లాల్లో అక్కడక్కడ శీతలగాలుల పరిస్థితులు ఏర్పడినట్టు వెల్లడించింది. ముఖ్యంగా క్రింది స్థాయి గాలులు రాష్ట్రంలో తూర్పు, ఆగ్నేయ దిశల నుండి వీస్తాయని తెలిపింది.