దీపావళి వేళ బైక్ లపై టపాసులతో రేసింగ్..

దిశ, శేరిలింగంపల్లి : పోలీసులు ఎన్ని చర్యలు తీసుకుంటున్నా పోకిరీలు తమ తీరు మార్చుకోవడం లేదు. వీకెండ్ వచ్చిందంటే చాలు ఐటీ కారిడార్ లో బైక్ లతో రెచ్చిపోతున్నారు. నగరంలోని ఆయా ప్రాంతాల నుండి మాదాపూర్ ఐటీ కారిడార్ కు వచ్చి మరీ బైక్ రేసింగ్ లకు పాల్పడుతున్నారు. పలుమార్లు పోలీసులు కేసులు నమోదు చేసినా వారు తీరు మార్చుకోవడం లేదు. తాజాగా దీపావళి సందర్భంగా టపాసులను బైక్ లకు కట్టుకుని మరీ రేసింగ్ లకు పాల్పడ్డారు.

ఈ వీడియోలు ఇప్పుడు సోషల్ మీడియాలో ట్రెండ్ అవుతున్నాయి. ఈ ఘటన పై ఆర్టీసీ ఎండీ వీసీ సజ్జనార్ స్పందించారు. దీపావళి వేళ ఇదేం వికృతానందం.. ఎటు వెళ్తుంది ఈ సమాజం అంటూ తన ఎక్స్( ట్విట్టర్ ) లో పోస్ట్ చేశారు. అయితే ఈ ఘటనకు సంబంధించి రాయదుర్గం పోలీసులు సీరియస్ గా యాక్షన్ తీసుకునేందుకు సిద్ధమయ్యారు. ఆకతాయిలను అటువైపు రాకుండా చర్యలు తీసుకోనున్నట్టు చెబుతున్నారు. వీకెండ్ లో గట్టి భద్రత పెంచనున్నారు.