జూబ్లీహిల్స్ లోని పలు ప్రాంతాలను పరిశీలించిన హైడ్రా కమిషనర్ రంగనాథ్
దిశ, ఖైరతాబాద్ : జూబ్లీహిల్స్ లోని నందగిరి హిల్స్, హుడా ఎన్‌క్లేవ్‌ కాలనీలతో పాటు గురుబ్రహ్మనగర్ బస్తీలను హైడ్రా కమిషనర్ ఏవీ రంగనాథ్ సందర్శించారు. ఆక్రమణలపై హైడ్రా కమిషనర్ ఏవీ రంగనాథ్ మంగళవారం క్షేత్రస్థాయిలో పర్యటించి పరిశీలించారు. గురుబ్రహ్మనగర్ బస్తీ ప్రాంతంలో డబుల్ బెడ్‌ రూం నిర్మించేందుకు కేటాయించిన స్థలాన్ని కొంతమంది ఆక్రమిస్తున్నారని, ఇదే సమయంలో బస్తీని ఆనుకుని ఉన్న పార్కు స్థలాలను కొంతమంది ఆక్రమణదారులు కబ్జా చేస్తున్నారని నందగిరిగిల్స్, హుడా ఎన్‌క్లేవ్‌ వాసులు కమిషనర్‌కు ఫిర్యాదు చేశారు. మొత్తం ఈ వ్యవహారంలో డీజీపీస్ (డిఫరెన్షియల్ గ్లోబల్ పోసిషనింగ్ సిస్టమ్) ద్వారా సర్వే చేయించి నిర్ధారించుకున్న తర్వాత విచారణ చేపడతామని కమిషనర్ హమీ ఇచ్చారు. బాధ్యలందరినీ పిలిపించి వారి వద్ద ఉన్న ఆధారాలను కూడా తనిఖీ చేస్తామని కమిషనర్ చెప్పారు. స్థానిక ఎమ్మెల్యే దానం నాగేందర్‌, అధికారులతో పాటు పలువురు స్థానిక నేతలు ఈ పర్యటనలో పాల్గొన్నారు.
