Fire Accident : సికింద్రాబాద్ ఆర్పీ రోడ్ లో అగ్నిప్రమాదం.. సకాలంలో స్పందించిన పోలీసులు
దిశ,బేగంపేట : సికింద్రాబాద్ మహంకాళి పోలీస్ స్టేషన్ పరిధి ఆర్పీ రోడ్డు లోని ఓ గోదాం లో గురువారం అర్ధరాత్రి అగ్నిప్రమాదం సంభవించింది. స్థానిక మహంకాళి పోలీసుల కథనం ప్రకారం ప్రకారం.. దీపావళి పండుగ నేపథ్యంలో బాణాసంచా కాలుస్తున్న క్రమంలో నిప్పు రవ్వలు రెండవ అంతస్తు లోని గోదాం లో పడడంతో ఒక్కసారిగా మంటలు చెలరేగాయి. అక్కడ ఎలక్ట్రికల్ (Electrical) సామాన్ల తో పాటు ఖాళీ అట్ట పెట్టేలను నిల్వ చేశారు. దీంతో క్రాకర్స్ (Crackers) నిప్పురవ్వలు పడి కాలిపోయాయి. రమేష్ ఎలక్ట్రికల్స్ కు చెందిన గోదాం నుంచి మంటలు రావడంతో ఒక్కసారిగా స్థానికులు భయాందోళనకు గురయ్యారు.
వారు వెంటనే డయల్ 100కు సమాచారం ఇచ్చారు . వెంటనే అక్కడకు చేరుకున్న మహంకాళి ఇన్స్పెక్టర్ పరశురాం సమాచారం మేరకు అగ్ని మాపక సిబ్బంది రెండు ఫైరింజన్లతో అక్కడకు చేరుకుని మంటలను అదుపులోకి తీసుకొచ్చారు.రమేష్ ఎలక్ట్రికల్ గోదాం పరిసర ప్రాంతాల్లో నివాసాలు లేకపోవడంతో ప్రమాదం తప్పింది..అగ్ని ప్రమాదంలో గోదాం లోని ఎలక్ట్రానిక్ వస్తువులు, ఖాళీ అట్ట పెట్టెలు అగ్నికి ఆహుతి అవ్వగా కొంతమేర ఆస్తి నష్టం జరిగింది.ఎలాంటి ప్రాణనష్టం జరగకపోవడంతో అంతా ఊపిరి పీల్చుకున్నారు.
