దారుణం..పెట్రోల్ పోసుకుని డబ్బులు అడిగిన క్యాషియర్ను చితకబాదిన వైనం
దిశ, చార్మినార్ : i20 కారులో రూ.1500 పెట్రోల్ పోసుకుని డబ్బులు అడిగిన క్యాషియర్ను నలుగురు గుర్తు తెలియని వ్యక్తులు చితకబాదిన ఘటన ఫలక్నుమా పోలీస్ స్టేషన్ పరిధిలో తీవ్ర కలకలం రేపుతోంది. ఫలక్నుమా ఇన్స్పెక్టర్ ఆదిరెడ్డి తెలిపిన వివరాల ప్రకారం ... ఫలక్నుమా లోని ఎస్సార్ పెట్రోల్ ఎల్పీజీ బంకులో గత కొంత కాలంగా జితేందర్ (31) అనే యువకుడు క్యాషియర్గా పనిచేస్తున్నాడు. ఎప్పటిలాగానే బుధవారం ఉదయం 10 గంటల ప్రాంతంలో జితేందర్ విధులు నిర్వహిస్తున్నాడు. అదే సమయంలో i20 కారులో వచ్చిన నలుగురు గుర్తు తెలియని వ్యక్తులు రూ.1500 పెట్రోల్ పోసుకున్నారు. క్యాషియర్ పోసుకున్న పెట్రోల్ డబ్బులు అడగగా పేటీఎం ద్వారా ట్రాన్స్ ఫర్ చేస్తున్నామన్నారు.
ఇంతలోనే కారు స్టార్ట్ చేసుకొని వెళ్తుండగా జితేందర్ పరిగెత్తుతూ కారు డోర్ పట్టుకుని వేలాడుతుండగా కారు స్పీడ్ను పెంచారు. అంతేగాకుండా కారు లోపల ఉన్న వాళ్లు క్యాషియర్ను కొట్టసాగారు. దాదాపు పావు కిలోమీటర్ ఫలక్నుమా బ్రిడ్జి వరకు కారులో ఈడ్చుకుంటూ వెళ్లి అక్కడ పడవేశారు. దీంతో క్యాషియర్ జితేందర్కి రక్తసిక్త గాయాలయ్యాయి. బాధితుడు పెట్రోల్ బంకు యజమానితో పాటు ఫలక్నుమా పోలీసులకు ఫిర్యాదు చేశారు. అతను ఇచ్చిన ఫిర్యాదు మేరకు ఫలక్నుమా పోలీసులు కేసును నమోదు చేసుకుని దర్యాప్తు చేస్తున్నారు.
