బ్యాడ్మింటన్ ఆడిన విరాట్, అనుష్క.. సోషల్ మీడియాలో వీడియో హల్ చల్

బెంగళూరు: ఎల్లప్పుడు అభిమానులకు దగ్గరగా ఉంటే స్టార్ జంటల్లో విరాట్ కోహ్లీ, అనుష్క శర్మ ఒకరు. క్రికెట్‌లో కోహ్లీ సూపర్ స్టార్ అయితే.. అనుష్క శర్మ నటిగా అనేక ప్రశంసలు అందుకుంది. ఓ ప్రైవేట్ కార్యక్రమంలో పాల్గొన్న వీరిద్దరు బ్యాడ్మింటన్ ఆడారు. ఈ వీడియో ప్రస్తుతం నెట్టింట్లో హల్ చల్ చేస్తోంది. అనుష్క తనకు ఎంతటి బలాన్నిస్తుందో కోహ్లీ తరచూ చెబుతుంటాడు. తన కష్టాల గురించి ఇటీవలే కోహ్లీ చెప్పాడు. ఆ సమయంలో అనుష్క తనకు ఎలా సహాయం చేసిందో కూడా తెలిపాడు. ‘చూడ్డానికి ప్రతిదీ బాగానే ఉన్నట్టు అనిపిస్తుంది. కానీ ఆ కష్టాలేంటో అందులో ఉన్న వాళ్లకు మాత్రమే తెలుస్తాయి. అందుకే నేను ప్రతిసారీ అనుష్క పేరును చెబుతాను.

ఎందుకంటే ఆమె అనేక సవాళ్లను ఎదుర్కొంది. వాటిని ఎదుర్కోవడానికి ఏం చేయాలో కూడా ఆమెకు బాగా తెలుసు. ఆమె నాతో మాట్లాడే మాటలు చాలా విలువైనవి. ఆమె నాకు నిజాన్ని వివరిస్తుంది’ అని జియో సినిమాకు సీఎస్‌కే మాజీ స్టార్ రాబిన్ ఉతప్పతో మాటల సందర్భంగా కోహ్లీ అన్నాడు. కోహ్లీ ఏ మ్యాచ్ ఆడినా అనుష్క స్టాండ్స్‌లో ఉండి అతనికి మద్దతుగా నిలుస్తుంది. ప్రస్తుతం జరుగుతున్న ఐపీఎల్ టోర్నీలోనూ ఆమె పలు మ్యాచ్‌లకు హాజరైంది.