చెన్నయ్ ఓపెన్ టోర్నీలో ఫైనల్‌కు సుమిత్
దిశ, స్పోర్ట్స్ : చెన్నయ్ ఓపెన్ టెన్నిస్ టోర్నీలో భారత స్టార్ ఆటగాడు సుమిత్ నాగల్ ఫైనల్‌కు దూసుకెళ్లాడు. శనివారం జరిగిన సెమీస్‌లో సుమిత్ 6-3, 6-4 తేడాతో 3వ సీడ్, చెక్ రిపబ్లిక్‌కు చెందిన దాలిబోర్ స్వర్చినాను ఓడించాడు. గంటా 55 నిమిషాలపాటు సాగిన ఈ మ్యాచ్‌లో సుమిత్ వరుసగా రెండు సెట్లను గెలిచి ప్రత్యర్థి కథ ముగించాడు. మొదట నువ్వానేనా అన్నట్టు సాగిన తొలి సెట్‌లో సుమిత్ వరుసగా 7, 8, 9 గేమ్‌లను గెలిచి శుభారంభం చేశాడు. రెండో సెట్‌లోనూ అదే జోరు కనబర్చిన సుమిత్ 5-1తో ఆధిక్యంలోకి వెళ్లాడు. సునాయాసంగా నెగ్గేలా కనిపించిన ఆ సెట్‌లో ప్రత్యర్థి అనూహ్యంగా పుంజుకుని 5-4తో పోటీలోకి వచ్చాడు. అయితే, 10వ గేమ్‌ను నెగ్గడం ద్వారా సుమిత్ విజేతగా నిలిచాడు. చెన్నయ్ ఓపెన్‌లో లియాండర్ పేస్, సోమ్‌దేవ్ దేవ్‌వర్మన్, యుకీ బాంబ్రీ తర్వాత ఫైనల్‌కు చేరుకున్న నాల్గొవ ఆటగాడు సుమిత్. నేడు జరిగే ఫైనల్‌లో టాప్ సీడ్, లూకా నార్డి(ఇటలీ)తో సుమిత్ తలపడనున్నాడు.
