ఫస్ట్‌ బాల్‌కే రిటైర్డ్ హర్ట్‌ అయిన బ్యాటర్.. ఆఖరి గేమ్‌లో రెచ్చిపోయిన పాక్‌ బౌలర్లు
దిశ, వెబ్‌డెస్క్: షార్జా వేదికగా ఆఫ్గానిస్తాన్‌తో జరిగిన మూడో టీ 20 మ్యాచ్‌లో పాకిస్తాన్‌ 66 పరుగుల తేడాతో విజయం సాధించింది. అయితే అంతకుముందు జరిగిన రెండు టీ20 మ్యాచ్‌ల్లోనూ ఆఫ్గాన్‌ గెలవడంతో మూడు మ్యాచ్‌ల సిరీస్‌ను 2-1 తేడాతో కైవసం చేసుకుంది. కాగా మొదటి రెండు మ్యాచుల్లో ఓడిపోయారనే కసితో ఉన్నారేమో ఆఖరి గేమ్‌లో పాక్‌ బౌలర్లు రెచ్చిపోయారు. కట్టుదిట్టంగా బౌలింగ్‌ చేయడమే కాకుండా వరుస బౌన్సర్లతో ఆఫ్గానిస్తాన్‌‌ను హడలెత్తించారు. ఈ క్రమంలో ఆఫ్గానిస్తాన్‌ బ్యాటర్ నజీబుల్లా జద్రాన్‌ పెను ప్రమాదం తప్పింది. పాక్‌ బౌలర్ ఇహ్సానుల్లా వేసిన ఓ బౌన్సర్‌ బ్యాట్‌ ఎడ్జ్‌ తీసుకుని జద్రాన్‌ దవడ బాగానికి బలంగా తాకింది.
దీంతో మైదానంలోనే తీవ్రమైన నొప్పితో విలావిల్లాడిపోయాడు నజీబుల్లా. పరిస్థితిని గమనించిన ఫిజియో వెంటనే మైదానంలోకి వచ్చి చికిత్స అందించాడు. అయినా నొప్పి తగ్గలేదు. దీంతో జద్రాన్‌ మైదానం విడిచిపెట్టాడు. కాగా జద్రాన్‌ ఎదుర్కొన్న తొలి బంతి కూడా ఇదే కావడం గమనార్హం. దీంతో ఫస్ట్‌ బాల్‌కే రిటైర్డ్ హర్ట్‌ అయి నిరాశగా వెనుదిరిగాడు నజీబుల్లా. ప్రస్తుతం ఈ ఘటనకు సంబంధించిన ఫొటోలు, సోషల్ మీడియాలో వైరల్‌గా మారాయి.
