నేడు బీజేపీలోకి చేరనున్న స్టార్ హీరోలు..
దిశ, డైనమిక్ బ్యూరో: కర్ణాటక రాజకీయాలు వేడెక్కుతున్నాయి. బీజేపీ, కాంగ్రెస్ మధ్య చేరికల పర్వం జోరందుకుంది. ఈ క్రమంలో కన్నడ స్టార్ హీరో కిచ్చా సుదీప్ బీజేపీ కండువా కప్పుకోబోతున్నారు. ఈయనతో పాటు మరో నటుడు దర్శన్ తూగదీపా సీఎం బసవరాజు బొమ్మై సమక్షంలో బుధవారం మధ్యాహ్నం ఓ ప్రైవేట్ హోటల్ లో అధికారికంగా బీజేపీలో చేరబోతున్నట్లు ప్రచారం జోరుగా జరుగుతోంది. గత కొంత కాలంగా కిచ్చా సుదీప్ పొలిటికల్ ఎంట్రీపై చర్చ హాట్ టాపిక్ గా నడుస్తోంది. గతంలో ఆయన కర్ణాటక కాంగ్రెస్ చీఫ్ డీకే శివకుమార్ తోనూ భేటీ అయ్యారు. సుదీప్ కాంగ్రెస్ లో చేరేలా సినీ నటి, మాజీ ఎంపీ రమ్య సంప్రదింపులు జరిపినట్లు అప్పట్లో పెద్ద ఎత్తన వార్తలు వచ్చాయి. వచ్చే నెల 10న ఎన్నికలు జరగనున్న నేపథ్యంలో అనూహ్యంగా కిచ్చా సుదీప్ బీజేపీ గూటికి చేరాలనే నిర్ణయానికి రావడం కన్నడ రాజకీయాల్లో ట్విస్ట్ గా మారింది. సుదీప్, దర్శన్ ఇద్దరు బీజేపీలో చేరుతుండటం కన్నడ రాజకీయాల్లో కీలక పరిణామంగా చెబుతున్నారు. వీరిని కమలనాధులు స్టార్ క్యాంపెనర్లుగా బాధ్యతలు అప్పగించే అవకాశం ఉందని ఉహాగానాలు వినిపిస్తున్నాయి. ఇదిలా ఉంటే బీజేపీలో చేరుతారనే వార్తల నేపథ్యంలో కిచ్చా సుదీప్ కు బెదిరింపు లేఖ వచ్చింది. దీనిపై సుదీప్ మేనేజర్ పోలీసులకు ఫిర్యాదు చేశారు.
ఇవి కూడా చదవండి: OTT: ఓటీటీలో విడుదలయ్యే సినిమాలేంటో తెలుసా?
