ప్రజ్వల్ రేవణ్ణ గురించి బయటకొస్తున్న సంచలనాలు..!

దిశ, నేషనల్ బ్యూరో: కర్ణాటకలో రాజకీయంగా సంచలనం సృష్టించిన హసన సెక్స్ కుంభకోణం గురించి షాకింగ్ విషయాలు బయటకొస్తున్నాయి. లైంగిక వేధింపులకు సంబంధించిన మహిళ ప్రజ్వల్ రేవణ్ణ వికృత చేష్టల గురించి బయటపెట్టింది. తన తల్లిపై ఐదేళ్ల క్రితం బెంగళూరులోని నివాసంలో ప్రజ్వల్ అత్యాచారానికి పాల్పడినట్లు ఆరోపించింది. తనకు మాటిమాటికి ఫోన్ చేసి అసభ్యంగా మాట్లాడేవాడని తెలిపింది. తన తల్లికి కాల్ చేసి.. వీడియో కాల్ లో తనను మాట్లాడాలని బలవంతపెట్టేవాడని వివరించింది. వీడియోకాల్ లో తనను దుస్తులు విప్పాలని అడిగేవాడని వాపోయింది. దానికి తను నిరాకరిస్తే.. తనని, తన తల్లిని బెదిరించేవాడని సిట్ అధికారులకు మహిళ వివరించింది.

తన తండ్రిని ఉద్యోగంలో నుంచి తీసేస్తానని బెదిరించి తన తల్లిపై అత్యాచారం చేశాడని పేర్కొంది. కుటుంబసభ్యులు పోలీసులకు ఫిర్యాదు చేయడంతో ఆమె తండ్రిని ఉద్యోగంలో నుంచి తీసేశారని వివరించింది. తన తల్లిని హెచ్డీ రేవణ్ణ కూడా లైంగికంగా వేధించాడని ఆ మహిళ ఆరోపించింది.

నాలుగైదు నెలలకు ఒకసారి మాత్రమే తన తల్లి ఇంటికి వచ్చేదని మహిళ బాధపడింది. తన తల్లి చాలా వేధింపులకు గురైందని వివరించింది. తన తల్లిని బానిసలా చూశారని.. తన తండ్రిపై దాడి చేశారని ఆరోపించింది. తన నివాసంలో పనిచేసే మహిళలను ప్రజ్వల్‌ వేధించేవాడని తెలిపింది. ప్రజ్వల్ రేవణ్ణ బాధితుల్లో ఎంతో మంది మహిళలు ఉన్నారని.. కేవలం ముగ్గురే బయటకొచ్చారని తెలిపింది.

సెక్స్ కుంభకోణం కేసులో ప్రజ్వల్‌ రేవణ్ణ, ఆయన తండ్రి హెచ్ డి రేవణ్ణపై మూడు ఎఫ్‌ఐఆర్‌లు నమోదయ్యాయి. అరెస్ట్ అయిన హెచ్‌డీ రేవణ్ణకు బెయిల్ రాగా.. ఈ ఘటన వెలుగులోకి వచ్చిన రోజే ప్రజ్వల్ దేశం విడిచి పారిపోయారు.