గుండె పోటుతో ముంబై క్రికెట్ అసోసియేషన్ అధ్యక్షుడి మృతి!
దిశ, డైనమిక్ బ్యూరో: ముంబై క్రికెట్ అసోసియేషన్ అధ్యక్షుడు అమోల్ కాలే న్యూయార్క్‌లో గుండెపోటుతో మరణించారు. టీ20 వరల్డ్ కప్ లో భాగంగా ఆదివారం జరిగిన ఇండియా, పాకిస్థాన్ మ్యాచ్ చూసేందుకు న్యూయార్క్ వెళ్లిన అమోల్ సోమవారం గుండె పోటుకు గురై మృతి చెందారు. న్యూయార్క్‌లోని నసావు కౌంటీ క్రికెట్ గ్రౌండ్‌లో ఆదివారం ముంబై క్రికెట్ బోర్డు సెక్రటరీ అజింక్యా నాయక్ తో పాటు మరో అధికారితో కలిసి భారత్ వర్సెస్ పాకిస్థాన్ మ్యాచ్‌ను అమోల్ కాలే వీక్షించారు. మ్యాచ్ ముగిసిన కొద్ది గంటలకి హోటల్ కి వెళ్లిన ఆయన గుండె పోటుతో మరణించారు. అమోల్ మరణం క్రికెట్ కమ్యూనిటీని భారీ షాక్ కు గురి చేసింది. దీనిపై క్రికెట్ వర్గాలు సంతాప సందేశంతో పాటు తమ దిగ్భ్రాంతిని వ్యక్తం చేస్తున్నారు. కాగా ముంబై క్రికెట్ అసోసియేషన్ కు అధ్యక్షుడిగా ఉన్న అమోల్ కాలేకు మహారాష్ట్ర ఉప ముఖ్యమంత్రి దేవేంద్ర ఫడ్నవీస్ కు అత్యంత సన్నిహితుగా పేరుంది.
