MUDA Scam: కర్ణాటక సీఎం సిద్ధరామయ్యకు సమన్లు
దిశ, నేషనల్ బ్యూరో: కర్ణాటక(Karnataka) రాష్ట్రంలో మైసూరు అర్బన్ డెవలప్‌మెంట్ అథారిటీ(ముడా/MUDA)కి చెందిన భూకేటాయింపు వివాదం(Land Allotment Scam) హీటెక్కుతున్నది. ఈ కేసులో నవంబర్ 6వ తేదీన విచారణకు హాజరవ్వాలని లోకాయుక్తా పోలీసులు సోమవారం సీఎం సిద్ధరామయ్య(CM Siddaramaiah)కు సమన్లు జారీ చేశారు. ఇది వరకే ఈ కేసు దర్యాప్తులో సిద్ధరామయ్య సతీమణి పార్వతి బీఎంను చేర్చిన విషయం తెలిసిందే. సెప్టెంబర్ 27వ తేదీన లోకాయుక్తా పోలీసులు ఈ వ్యవహారంపై ఎఫ్ఐఆర్ ఫైల్ చేశారు. సీఎం సిద్ధరామయ్య, ఆయన భార్య పార్వతి, ఆయన బావమరిది మల్లికార్జున్ స్వామి, దేవరాజు పేర్లను ఎఫ్ఐఆర్‌లో పేర్కొన్నారు. దేవరాజు నుంచి మల్లికార్జున్ స్వామి భూమి కొనుగోలు చేసి పార్వతికి గిఫ్ట్ ఇచ్చారు. ఈ వివాదం తీవ్రరూపం దాల్చుతుండటంతో అవకతవకలపై మరింత స్పష్టత కోసం లోకాయుక్తా పోలీసులు సీఎం సిద్ధరామయ్యనూ విచారించడానికి నిర్ణయించారు. మైసూరు ల్యాండ్ స్కామ్‌లో మనీ లాండరింగ్ కోణంలో 2020 నుంచి 2022 ముడా కమిషనర్‌గా పని చేసిన డీబీ నటేశ్‌లను ఈడీ ప్రశ్నించింది. ఆ తర్వాత నటేశ్‌ను కస్టడీకి తీసుకున్నారు. నటేశ్ తన హయాంలో 14 సైట్లను సిద్ధరామయ్య భార్య పార్వతికి అలాట్ చేశారు. ముడా భూకేటాయింపులో అవకతవకలు జరిగాయన్న ఆరోపణలు వచ్చిన తర్వాత పార్వతి ఆ భూములను వెనక్కి ఇవ్వాలని నిర్ణయం తీసుకున్నారు. కాగా, సీఎం సిద్ధరామయ్య తన కుటుంబ సభ్యులు ఎవరూ ఎలాంటి అవకతవకలకు పాల్పడలేదని, ఇది కేవలం రాజకీయ కుట్ర అని కొట్టిపారేశారు. తనపై నమోదైన తొలి రాజకీయ కేసు అని పేర్కొన్నారు.
