Bihar assembly: పరీక్షల్లో అక్రమాలకు పాల్పడితే పదేళ్ల జైలు శిక్ష..బిల్లుకు బిహార్ అసెంబ్లీ ఆమోదం
దిశ, నేషనల్ బ్యూరో: నీట్ యూజీ పేపర్ లీక్ అంశం దేశ వ్యాప్తంగా తీవ్ర దుమారం రేపిన విషయం తెలిసిందే. అంతేగాక పలు పరీక్షల ప్రశ్నపత్రాలు సైతం లీకైన ఘటనలు సైతం ఇటీవల వెలుగు చూశాయి. ఈ నేపథ్యంలో బిహార్ ప్రభుత్వం కీలక నిర్ణయం తీసుకుంది. పోటీ పరీక్షల్లో అవకతవకలను అరికట్టేందుకు బిహార్ పబ్లిక్ ఎగ్జామినేషన్స్(ప్రివెన్షన్ ఆఫ్ అన్ ఫేర్‌మీన్స్)-2024 పేరుతో బిల్లు తీసుకొచ్చింది. దీని ప్రకారం..పోటీ పరీక్షల్లో అక్రమాలకు పాల్పడితే 3 నుంచి పదేళ్ల వరకు జైలు శిక్షతో పాటు, రూ. కోటి జరిమానా విధించే అవకాశం ఉంది.
అంతేగాక దోషులుగా తేలిన వారి ఆస్తులను అటాచ్ చేయడానికి, పరీక్షల్లో అక్రమాలకు పాల్పడి అరెస్టైన వ్యక్తులు బెయిల్ పొందడం కూడా కష్టతరం కానుంది. ఈ బిల్లును రాష్ట్ర అసెంబ్లీ వ్యవహారాల మంత్రి విజయ్ కుమార్ బుధవారం సభలో ప్రవేశపెట్టగా.. మూజువాణి ఓటుతో సభ ఆమోదం తెలిపింది. గవర్నర్ ఆమోదం తర్వాత ఈ బిల్లు అమల్లోకి రానుంది. మరోవైపు బిల్లుపై అసెంబ్లీలో చర్చ సందర్భంగా విపక్షాలు సభ నుంచి వాకౌట్ చేశాయి. విపక్షాల ఆందోళన మధ్యే బిల్లును ఆమోదించింది. ఈ బిల్లును అంతకుముందే సభలో ప్రవేశపెట్టాల్సి ఉండగా, విపక్షాల ఆందోళన కారణంగా ప్రభుత్వం దానిని వాయిదా వేసింది. ఈ నేపథ్యంలోనే తాజాగా ఆమోదించింది.
