ఇజ్రాయెల్-పాలస్తీనా యుద్ధంలో ఇరుక్కుపోయిన బాలీవుడ్ నటి.. ఆందోళనలో ఫ్యాన్స్
దిశ, సినిమా: ఇజ్రాయెల్, పాలస్తీనా మధ్య భీకర యుద్ధం జరుగుతున్న విషయం తెలిసిందే. కాగా ఇందులో బాలీవుడ్ నటి నుస్రత్ భరుచా ఇరుక్కుపోయినట్లు న్యూస్ వైరల్ అవుతోంది. ‘హైఫా ఇంటర్నేషనల్‌ ఫిల్మ్‌ ఫెస్టివల్‌’ కోసం ఇజ్రాయెల్ వెళ్లిన నుస్రత్ శనివారం మధ్యాహ్నం 12.30 గంటల వరకు తన టీమ్‌తో టచ్‌లో ఉందని, ఆ తర్వాత ఆమె నుంచి ఎలాంటి సమాచారం లేకపోవడంతో సంబంధాలు పూర్తిగా తెగిపోయినట్లు ఆమె టీమ్‌ సభ్యుల్లో ఒకరు తెలిపారు. చివరిసారి నుస్రత్‌కు, ఆమె టీమ్‌కు సంభాషణ జరిగినప్పుడు ఆమె బేస్మెంట్లో అందరితో పాటు సురక్షితంగా ఉన్నట్లు వెల్లడించారని, ఆ తర్వాత నటితో కమ్యూనికేషన్‌ లేదని చెప్పడంతో ఆమె ఫ్యాన్స్ కంగారు పడిపోయారు. అయితే తాజా సమాచారం ప్రకారం ఆమె సురక్షితంగా బయటపడినట్లు తెలుస్తోంది. ఇజ్రాయెల్‌లోని భారత రాయబార కార్యాలయం సహాయంతో నుస్రత్ ఎయిర్‌పోర్టుకు చేరుకుందని, మరో 24 గంటల్లో భారత్‌కు రాబోతుందని సమాచారం.
