ఇల్లాలు

పొద్దు పొడిస్తే బతుకంతా రణరంగమే

కళ్ళు తెరిచి పద్మవ్యూహంలో జొరబడి

వీరంగం చేయడమే ఆమె విధి నిర్వహణ

బరువులు బాధ్యతలు

తెచ్చి పెట్టుకున్న బంధాలు

విధాత రాసిన కర్మలు

ఏ ఒక్కటి ఊపిరి

పీల్చుకోనివ్వవు ఒక్క క్షణం.

అందరూ పల్లకి ఎక్కి కూర్చుని

బోయిలు ఎవరంటే

భుజాలు తడుపుకుంటారు.

జరిగిన తప్పులకు

జవాబుదారిని చేస్తారు

ఉరిమే చూపులతో ప్రశ్నిస్తారు.

అందరికీ ఆదివారం సెలవు

మరి ఆమెకి.. రోజు ఉండే

ఒక క్షణం విరామానికి

ఆ రోజు సెలవు.

ఎన్నెన్నో ప్రణాళికలు

ఎన్నెన్నో పూజలు

కనిపించని దేవుళ్ళు

అందరికీ మొక్కులు

ఆమె కోరిక ఒక్కటే

ఆ కుటుంబ క్షేమం

ఇలా అలసి సొలసి

ఆలోచనతో మస్తిష్కం వేడెక్కి

రక్తం మరిగి మరిగి గుండె బెదిరి

ఆ నిర్జీవమైన కళ్ళు

తీరని బాధ్యతలను చూస్తూ

ఆ క్షణంలో కూడా... బాధ్యతను

మరిచిపోని మహా ఇల్లాలు.

మధునాపంతుల చిట్టి వెంకట సుబ్బారావు

94917 92279