Health Tips : శరీరంలో రక్తం తక్కువగా ఉందా..? పెరగాలంటే వీటిని తినాల్సిందే!

దిశ, ఫీచర్స్ : చిన్న పిల్లలు, స్త్రీలలో రక్తహీనత సమ్యలు తరచుగా తలెత్తుతున్నట్లు ఆరోగ్య నివేదికలు పేర్కొంటున్నాయి. వాస్తవానికి మనం తినే ఆహారం ద్వారానే శరీరంలో రక్తం తయారవుతుంది. కాగా అందుకు అవసరమైన హిమోగ్లోబిన్ ఉన్నప్పుడే ఇది సాధ్యం అవుతుంది. ఒకవేళ తక్కువగా ఉంటే రోగనిరోధక వ్యవస్థ పనిచేయదు. దీంతోపాటు వ్యాధుల బారిన పడే అవకాశం పెరుగుతుంది. అందుకే మీ రోజువారీ డైట్‌లో శరీరంలో హిమోగ్లోబిన్ ప్రొడ్యూస్ అయ్యేందుకు అవసరమైన ఆహారాలు చేర్చుకోవాలని పోషకాహార నిపుణులు సూచిస్తున్నారు. అవేమిటో చూద్దాం.

*ఆకు కూరలు : ఆకుకూరలు హిమోగ్లోబిన్ లెవెల్స్ పడిపోకుండా ఉపయోగపడతాయి. ముఖ్యంగా పాలకూర, పాయల్ కూర, తోటకూర, బచ్చలికూర అందుకు దోహదపడతాయి. వీటితోపాటు గ్రీన్ కలర్‌లో ఉండే బ్రొకలీ, క్యాప్సికం కూడా హిమోగ్లోబిన్ లెవల్స్ పెంచుతాయి. వీటిలో విటమిన్ 12, విటమిన్ ఎ, సి, అలాగే మెగ్నీషియం, ఐరన్ వంటి పోషకాలు ఉంటాయి. కాబట్టి ఎర్రరక్త కణాల పెరుగుదలకు దోహదం చేస్తాయి.

*ఖర్జూరం, దానిమ్మ, బీట్‌రూట్ : ఖర్జూరం, దానిమ్మ, అరటి పండ్లు హిమోగ్లోబిన్ స్థాయిని పెంచగలిగే అద్భుతమైన ఫలాలుగా ఆహార నిపుణులు పేర్కొంటున్నారు. దానిమ్మవల్ల బ్లడ్ కౌంట్ పెరుగుతుంది. ప్రొటీన్, విటమిన్ ఎ, విటమిన్ సి, విటమిన్ ఇ, ఐరన్, ఫైబర్, కార్బొహైడ్రేట్స్ ఇందులో పుష్కలంగా ఉంటాయి. ఇక ఖర్జూరంలో విటమిన్ బి కాంప్లెక్స్, ఐరన్ ఉంటాయి కాబట్టి హిమోగ్లోబిన్ పెరుగుదలకు కారణం అవుతుంది. అరటి పండులో ఉండే ఐరన్, ఫైబర్ కంటెంట్ రోగ నిరోధక శక్తిని, హిమోగ్లోబిన్ లెవల్స్‌ను పెంచుతాయి. అలాగే బీట్ రూట్, ఉసిరి, నిమ్మ వంటివి కూడా ఇందుకు సహాయపడతాయి.

*గమనిక : పైవార్తలోని సమాచారం ఇంటర్నెట్ ఆధారంగా సేకరించబడింది. అనుమానాలు ఉంటే పోషకాహార నిపుణులను సంప్రదించగలరు.