హుజురాబాద్ టికెట్ కోసం మంతనాలు.. కాంగ్రెస్లో ఎవరికి?
దిశ, తెలంగాణ బ్యూరో: టీపీసీసీ చీఫ్గా రేవంత్రెడ్డి నియామకంతో కాంగ్రెస్లో పరిణామాలు వేగంగా మారుతున్నాయి. మొన్నటి వరకు కాంగ్రెస్ సీనియర్లను పట్టించుకోకుండా ఉన్న హుజురాబాద్ కాంగ్రెస్ నేత కౌశిక్రెడ్డి రెండు రోజుల్లోనే రూటు మార్చారు. ఒకవైపు రేవంత్రెడ్డి ముందున్న పెద్ద టాస్క్ రాబోయే హుజురాబాద్ ఉపఎన్నికలే అంటూ రాజకీయవర్గాలు అంచనా వేస్తున్నాయి. దీంతో అక్కడ కాంగ్రెస్ నుంచి ఎవరిని బరిలోకి దింపుతారనేది చర్చగా మారింది.
కౌశిక్ స్థానం పదిలమేనా..?
ఇటీవల పరిణామాల్లో కౌశిక్రెడ్డి వ్యవహారం పార్టీకి తలనొప్పిగా మారింది. ప్రధానంగా ఎంపీ రేవంత్రెడ్డి ముందుగా ఈటల రాజేందర్ భూ వ్యవహారంలో ఆయనకు అండగా ఉన్నట్లు ప్రభుత్వంపై ఆరోపణలు చేశారు. అంతేకాకుండా దేవరయాంజల్ భూముల అంశంపై ఉద్యమించారు. అదే సమయంలో హుజురాబాద్ నేత కౌశిక్రెడ్డి పార్టీ ఆదేశాలను కాదని వ్యక్తిగతంగా ఈటలను టార్గెట్ చేశారు. ఓవైపు కాంగ్రెస్ పార్టీ ఈటలను వెనకేసుకొస్తుంటే కౌశిక్ మాత్రం వ్యతిరేకించారు. దీనిపై మాజీ ఎంపీ పొన్నం ప్రభాకర్ కూడా పార్టీకి లేఖ రాశారు. ఈటల వ్యవహారంలో అసలు పార్టీ వైఖరి ఏమిటో స్పష్టం చేయాలంటూ నిలదీశారు. కానీ అప్పటి టీపీసీసీ చీఫ్ ఉత్తమ్ సమీప బంధువు కావడంతో కౌశిక్రెడ్డిపై ఎలాంటి చర్యలు తీసుకోలేదు. అదే సమయంలో టీఆర్ఎస్తో కౌశిక్ అంటకాగుతున్నాడనే ఆరోపణలు సైతం వచ్చాయి. దాన్ని నిజం చేస్తూ మంత్రి కేటీఆర్తో ఓ కార్యక్రమంలో కౌశిక్ పెట్టిన గుసగుసలు బలంగా మారాయి. కౌశిక్ వెనకుండి టీఆర్ఎస్ ఈటలపై విమర్శలు చేయిస్తుందనే విమర్శలు ఎదుర్కొన్నారు. అయితే కౌశిక్రెడ్డి కూడా దీనిపై స్పందించిన తీరు తక్కువే.
తాజాగా రూట్ ఛేంజ్
మొన్నటి వరకు ఒకవిధంగా ఉత్తమ్ అండతో పార్టీలోని సీనియర్లను కౌశిక్ పరిగణలోకి తీసుకోలేదని పార్టీ నేతలు చెప్పుకుంటున్నారు. అయితే తాజాగా రేవంత్రెడ్డి పగ్గాలు ఇవ్వడం, సీనియర్ల నోటికి తాళాలు వేసి, రేవంత్ నిర్ణయాలే కీలకమని ఏఐసీసీ సంకేతాలివ్వడంతో నేతలు రూట్ మారుస్తున్నారు. ఇదేరూట్లో కౌశిక్రెడ్డి కూడా చేరారు. సోమవారం ఉదయం రేవంత్రెడ్డి ఇంటికి చేరుకుని అభినందనలు తెలిపారు. అనంతరం హుజురాబాద్ నియోజకవర్గం రాజకీయ పరిణామాలను చర్చించారు. తాను పోటీకి సిద్ధమంటూ సంకేతాలిచ్చారు.
టికెట్ ఎవరికి?
మరోవైపు కౌశిక్రెడ్డి అంశంలో రేవంత్రెడ్డి కూడా కొంత సీరియస్గానే ఉన్నట్లు తెలుస్తోంది. ఇప్పటికే రెండుసార్లు హుజురాబాద్ నుంచి పోటీ చేసి ఓడిపోయారు. అదెలా ఉన్నా.. ఇప్పుడు ఆయన్ను హుజురాబాద్ నుంచి పోటీ చేస్తే టీఆర్ఎస్లో లోపాయికారికంగా ఒప్పందాలు చేసుకుంటారంటూ పార్టీ నేతలు రేవంత్కు సమాచారమందిస్తున్నారు. దీనికి బలమైన కారణాలు కూడా చూపిస్తున్నారు. ప్రస్తుతం చాలా క్లిష్టమైన సమయంలో పీసీసీ పీఠంపై కూర్చున్న రేవంత్రెడ్డికి ముందు హుజురాబాద్ టాస్కే కీలకంగా మారుతోంది. ఇలాంటి సమయంలో కౌశిక్రెడ్డికి టికెట్ ఇవ్వరని, మాజీ ఎంపీ పొన్నం ప్రభాకర్ను అక్కడి నుంచి పోటీకి దింపే అవకాశం ఉందనే ప్రచారం జరుగుతోంది. ఇలాంటి సమయంలో కౌశిక్రెడ్డి మాత్రం రేవంత్ను కలిసి తాను పార్టీ విధేయుడినే అంటూ నమ్మకం కల్పించుకునే ప్రయత్నాలు చేస్తున్నారు. త్వరలో హుజురాబాద్కు ఉప ఎన్నికలు వస్తే… రేవంత్రెడ్డి ఎలాంటి నిర్ణయం తీసుకుంటారనేది ఇప్పుడు పార్టీలో హాట్ టాపిక్.
