'దృశ్యం' సీన్స్ రిపీట్.. పోలీస్ స్టేషన్ లో అస్థిపంజరం కలకలం

దిశ,వెబ్ డెస్క్: నిజ జీవితంలో జరిగిన కొన్ని సంఘటనలు అచ్చం సినిమాల్లో జరిగినట్టే అనిపిస్తూ ఉంటాయి. కొంతమంది సినిమాలను చూసి ప్రేరణ పొంది హత్యలు చేస్తారా? లేక వాస్తవ సంఘటనలను ఆధారంగా చేసుకొనే సినిమాలను తీస్తారా? అనేది అంతుచిక్కని ఒక ప్రశ్న. తాజాగా గుజరాత్ లో జరిగిన ఒక సంఘటన మాత్రం అచ్చు గుద్దినట్లు ఒక సినిమా స్టోరీనే తలపిస్తుంది. తెలుగులో వెంకటేష్ నటించిన ‘దృశ్యం’ సినిమా చూసారా? కూతురిని కాపాడుకోవడానికి వెంకటేష్ ఒక కుర్రాడిని చంపేసి పోలీస్ స్టేషన్ లో పాతిపెడతాడు. పోలీసులకు ఎప్పటికీ ఆ శవం దొరకదు అంటూ డైలాగులు చెప్తాడు. తాజాగా ఇలాంటి ఘటనే పోలీసులకు సవాల్ గా మారింది. పోలీస్ స్టేషన్ లో ఒక మనిషి అస్థిపంజరం బయటపడింది.

గుజరాత్ రాష్ట్రంలోని సూరత్ జిల్లాలో ఖటోదర పోలీస్ స్టేషన్ ఉంది. నిత్యం కేసులతో బిజీగా ఉండే ఈ స్టేషన్లో ఒక అస్థిపంజరం కలకలం సృష్టిస్తుంది. ఎన్నాళ్లగానో సీజ్ చేసిన వాహనాలు తుప్పు పట్టిపోవడంతో.. వాటిని తొలగించడానికి చర్యలు చేపట్టిన పోలీసులకు ఎప్పుడో పూడ్చిపెట్టిన ఒక అస్థిపంజరం కనిపించింది. దీంతో అవాక్కయిన పోలీసులుకు దృశ్యం సినిమానే కళ్ళముందు కనిపించింది. అయితే, అసలు ఆ అస్థిపంజరం ఎవరిది? ఎన్నాళ్ల క్రితం పూడ్చారు? ఎవరు చంపి ఉంటారు? ఎప్పుడు పూడ్చిపెట్టి ఉంటారు? అన్న ప్రశ్నలకు సమాధానం లేదు. ఈ నేపథ్యంలో పోలీసులు అప్రమత్తమయ్యారు. ఆ అస్థిపంజరం ఎవరిది? అనే దిశగా పోలీసులు విచారణ చేపట్టారు.