వివాహ వేడుకలో తుపాకీతో కాల్పులు.. నవ దంపతులు షాక్
దిశ, వెబ్‌డెస్క్ : వివాహ వేడుకల్లో తుపాకీతో కాల్పులు జరపడం ఢిల్లీలో కలకలం సృష్టించింది. తలపై రివాల్వర్ పెట్టుకుని గాలిలోకి పేల్చిన దృశ్యాలు సోషల్ మీడియాలో వైరల్ అయ్యాయి. ఆ వీడయో క్లిప్‌లు పోలీసులకు చేరడంతో యువకుడిని అదుపులోకి తీసుకున్నారు.
ఢిల్లీకి చెందిన ఆశిష్ అలియాస్ మనీష్ (32) పాత నేరస్తుడు. గురువారం జరిగిన తన బంధువుల వివాహానికి హాజరైన ఆశిష్.. డీజే పాటలకు డ్యాన్స్ చేశాడు. ఈ క్రమంలో తన దగ్గర అక్రమంగా ఉన్న రివాల్వర్‌ను తీసి తలపై పెట్టుకున్నాడు. ఎదురుగా ఉన్న వారితో వీడియో తీయండి అంటూ అరుస్తూ గాలిలోకి ఒక రౌండ్ కాల్పులు జరిపాడు. ఈ ఘటనతో పెళ్లికి వచ్చిన వారితోపాటు వధూవరుడు షాక్ అయ్యారు. ఆ తర్వాత ఆ వీడియో కాస్త సోషల్ మీడియాలో ట్రోల్ కావడంతో పోలీసులు రంగప్రవేశం చేశారు.
ఆశిష్ వందల మంది ఉన్న వివాహ వేడుకల్లో కాల్పులు జరపడం, అక్రమంగా తుపాకీని కలిగి ఉండడం నేరంగా పరిగణించి అతడిని అరెస్ట్ చేశారు. అతడికి తుపాకీ ఎక్కడి నుంచి వచ్చింది. కాల్పులు ఎందుకు జరిపాడు అనే కోణంలో పోలీసులు దర్యాప్తు చేస్తున్నారు.
