దేశ రాజధానిలో సంచలన ఘటన
దిశ, వెబ్ డెస్క్: దేశ రాజధాని ఢిల్లీలో మరో గ్యాంగ్ రేప్ కేసు సంచలనం సృష్టిస్తోంది. టూరిస్ట్ గైడ్ పై సామూహిక అత్యాచారానికి పాల్పడిన ఘటన ఆలస్యంగా వెలుగులోకి వచ్చింది. కనాట్ ప్లేస్ మార్కెట్‌కు కేవలం 2 కి.మీ దూరంలో ఇండియా గేట్‌ సమీపంలో ఉన్న ఫైవ్‌స్టార్‌ హోటల్‌లో తనపై సామూహిక అత్యాచారం చేసినట్లు ఆదివారం ఓ మహిళ పోలీసులకు ఫిర్యాదు చేసింది.
న్యూఢిల్లీ డిప్యూటీ పోలీస్ కమిషనర్ ఐష్ సింఘాల్ తెలిపిన వివరాల ప్రకారం.. హైసెక్యూరిటీ జోన్‌ అయిన సెంట్రల్‌ ఢిల్లీలోని ఓ ఫైవ్‌స్టార్‌ హోటల్‌లో బాధిత మహిళ.. టికెట్‌ బుకింగ్‌ ఎగ్జిక్యూటివ్‌, టూరిస్ట్ గైడ్‌గా పని చేస్తోంది. తనపై ఆరుగురు వ్యక్తులు సామూహిక అత్యాచారానికి పాల్పడినట్లు సదరు మహిళ ఫిర్యాదు చేసింది.
ఆరోపణలు ఎదుర్కొంటున్న వ్యక్తులు నేరం జరిగిన హోటల్‌లో గదిని బుక్‌చేసుకున్నారు. అదే హోటల్‌లో టికెట్‌ బుకింగ్‌ ఎగ్జిక్యూటివ్‌గా పనిచేస్తున్న బాధిత మహిళకి డబ్బు అవసరం ఉన్నట్లు వారు గుర్తించారు. వెంటనే ఆమెకు తక్కువ వడ్డీకి రుణం మంజూరు చేస్తామని చెప్పి ఆమెను హోటల్‌ గదికి తీసుకెళ్లి అత్యాచారానికి పాల్పడ్డారు.
బాధిత మహిళ ఫిర్యాదుతో ఓ మహిళ సహా ఆరుగురు వ్యక్తులపై ఐపీసీ సెక్షన్‌ 376డి, 323, 34ల కింద కేసు నమోదు చేసినట్లు తెలిపారు. ఘటనలో ప్రధాన నిందితుడైన మనోజ్‌ శర్మ అనే వ్యక్తిని అరెస్ట్‌ చేసి దర్యాప్తు కొనసాగిస్తున్నట్లు వెల్లడించారు.
