వాగులో తండ్రీ కూతురు గల్లంతు.. ఒకరి మృతి!
దిశ, వెబ్‌డెస్క్ : ఏపీలోని చిత్తూరు జిల్లాలో విషాదకర ఘటన చోటుచేసుకుంది. రాష్ట్రంలో కురుస్తున్న భారీ వర్షాలకు పెనుమూరులోని కొండయ్యగారి పల్లి వద్ద వాగు ఉధృతంగా ప్రవహిస్తోంది.అదే సమయంలో అటుగా వచ్చిన కారు కిలోమీటరు మేర ప్రహహంలో కొట్టుకుపోయి ఓ బండరాయిని తట్టుకుని ఆగిపోయింది. అందులో ఉన్న తండ్రీ కూతురు నెమ్మదిగా తప్పించుకోవాలని ప్రయత్నించగా.. ప్రమాదవశాత్తు వాగులో గల్లంతయ్యారు.
బాధితులు ఒడ్డారపల్లికి చెందిన ప్రతాప్, కూతురు వినూత్నగా గుర్తించారు. అంతకుముందు కారు అద్దాలు పగులగొట్టి ముగ్గురిని డ్రైవర్ రక్షించాడు. సమాచారం అందుకున్న పోలీసులు స్థానికులతో కలిసి కారును బయటకు తీశారు. ఇదిలాఉండగా, గల్లంతైన వినూత్న మృతదేహం లభ్యం కాగా, తండ్రి ఆచూకీ ఇంకా దొరకలేదు. విషయం తెలుసుకున్న స్థానిక ఎమ్మెల్యే శ్రీనివాసులు స్వయంగా గాలింపు చర్యల్లో పాల్గొని పరిస్థితిని సమీక్షిస్తున్నారు.
