హోలీ మార్చి 24, 25 ఏ రోజు జరుపుకోవాలి.. పండితులు ఏం చెబుతున్నారు..

దిశ, ఫీచర్స్ : ఫాల్గుణ మాసంలో జరుపుకునే అతిపెద్ద రంగుల పండుగ హోలీ. ఇది రెండు రోజుల పండుగ. మొదటి రోజు హోలికా దహనం జరుగుతుంది. రెండవ రోజు వివిధ రంగులతో హోలీ ఆడతారు. ఈ రెండు రోజులకు ప్రత్యేక ప్రాముఖ్యత ఉంది. అయితే ప్రతి సంవత్సరం మాదిరిగానే హోలీ ఈ ఏడాది ఏ రోజు జరుపుకోవాలి అనే విషయం పై ప్రజలు అయోమయంలో ఉన్నారు. పంచాంగం ప్రకారం ఈ ఏడాది హోలీని ఏ రోజు జరుపుకోవాలో పండితులు ఏం చెబుతున్నారో ఇప్పుడు తెలుసుకుందాం.

పంచాంగం ప్రకారం ఈ సంవత్సరం ఫాల్గుణ మాసం పౌర్ణమి మార్చి 24 ఉదయం 9:54 గంటలకు ప్రారంభమవుతుంది. ఇది మరుసటి రోజు మధ్యాహ్నం 12:29 గంటలకు ముగుస్తుంది. దీంతో హోలికా దహనం మార్చి 24, ఆదివారం జరుపుకోవాలని పండితులు చెబుతున్నారు. హోలికా దహనంకు అనుకూలమైన సమయం ఉదయం 11:13 నుండి మధ్యాహ్నం 12:27 వరకు అని చెబుతున్నారు. అంటే హోలికా దహనం 1 గంట 14 నిమిషాల పాటు చేయవచ్చు.

హోలికా దహన్ మార్చి 24న జరుగుతుంది. కాబట్టి హోలీ రంగుల పండుగను మార్చి 25న ఆడవచ్చు. దేశవ్యాప్తంగా హోలీని రంగులతో జరుపుకుంటారు. ఈ రోజున శత్రువులు కూడా ఒకరినొకరు ఆలింగనం చేసుకుని హోలీ శుభాకాంక్షలు తెలుపుకుంటారు.

హోలికా దహన్ పూజ..

హోలికా దహన్ రోజున ఓ చెక్క కుప్పను హోలిక రూపంలో కాల్చుతారు. హోలిక పూజ కోసం హోలిక విగ్రహాన్ని ఆవు పేడతో తయారు చేస్తారు. పూజ సామగ్రిలో బియ్యం, పూలు, పత్తి, పూల దండలు, పసుపు, కుంకుమ, గులాల్, కొబ్బరి, బటాషా, 5 నుండి 7 రకాల ధాన్యాలు ఉపయోగిస్తారు. దీని తర్వాత హోలికకు ప్రదక్షిణలు చేసి హోలికా దహనం చేస్తారు.

హోలీ..

ఈ రోజున హిరణ్యకశిపుడు తన సోదరి హోలిక ద్వారా తన కుమారుడైన ప్రహ్లాదుని సజీవ దహనం చేయాలనుకున్నాడని నమ్ముతారు. అయితే ప్రహ్లాదుడి భక్తి గెలిచింది. హోలిక అగ్నిలో బూడిదైంది. అప్పటి నుండి హోలికా దహన్ సంప్రదాయం కొనసాగుతోంది. హోలికా దహన్ మరుసటి రోజున రంగుల పండుగ జరుపుకుంటారు. రంగుల హోలీని దుల్హందీ అని కూడా అంటారు.