రెజ్లర్ సుశీల్ ఆచూకీ చెబితే రూ. లక్ష రివార్డు
దిశ, వెబ్‌డెస్క్ : మర్డర్ కేసులో ఆరోపణలు ఎదుర్కొంటూ పరారీలో ఉన్న భారత స్టార్ రెజ్లర్ సుశీల్‌కుమార్‌‌‌ను పట్టుకునేందుకు ఢిల్లీ పోలీసులు కొత్త ప్లాన్ వేశారు. సుశీల్ ఆచూకీ తెలిపిన వారికి రూ.లక్ష, అతని అనుచరుడి సమాచారమిస్తే రూ.50వేల రివార్డు మనీ ఇవ్వనున్నట్లు ఢిల్లీ పోలీసులు ప్రకటించారు. అయితే, ఈ నెల 4వ తేదీన ఢిల్లీలోని ఛత్రిశాల స్టేడియంలో చోటుచేసుకున్న ఘర్షణలో సాగర్ దండక్‌ అనే రెజ్లర్ మరణించిన విషయం తెలిసిందే. సుశీల్ కుమార్, అతని అనుచరులు దాడి చేయడంతోనే సాగర్ మృతి చెందినట్లు గుర్తించడమే కాకుండా, ఆధారాలు సేకరించి కేసు నమోదు చేసినట్లు ఢిల్లీ పోలీసులు తెలిపారు.
హాకీ, బేస్‌బాల్‌ బ్యాట్లతో సుశీల్ స్వయంగా దాడి చేసినట్లు ఒక వీడియోలో స్పష్టంగా ఆధారాలు దొరికాయి. దీంతో పోలీసులు సుశీల్‌పై హత్య కేసు నమోదు చేసి, అతని కోసం తీవ్రంగా గాలిస్తున్నారు. హత్య జరిగిన మరుసటి రోజు నుంచి సుశీల్ కుమార్ కనిపించకుండా పోయాడు. అతడితో పాటు అతని స్నేహితులపై పోలీసులు ఇప్పటికే రెడ్ కార్నర్ నోటీసులు జారీ చేయడంతో పాటు ఢిల్లీ పోలీసులు 20 బృందాలుగా విడిపోయి గాలిస్తున్నారు.
వారం రోజులుగా అతని ఆచూకీ కోసం గాలిస్తున్నా ఫలితం లేదు. ఢిల్లీ, హర్యానా, యూపీలోని పలు చోట్ల గాలింపులు చేపట్టినా ఫలితం లేకపోవడంతో చివరి అస్త్రంగా ఢిల్లీ పోలీసులు ఆచూకీ చెబితే రూ.లక్ష రివార్డు ఇవ్వనున్నట్లు ప్రకటించారు. అలాగే ఇదే కేసులో అతని అనుచరుడు అజయ్ అనే వ్యక్తి సమాచారం ఇస్తే రూ.50వేల రివార్డు ఇవ్వనున్నట్లు వెల్లడించారు.
