వెల్ విషర్స్ హాస్పిటల్ లైసెన్స్ రద్దు
దిశ, మేడిపల్లి : వెల్ విషర్స్ హాస్పిటల్ లైసెన్స్ ను అధికారులు రద్దు చేశారు. అర్హతకు మించి వైద్యం అందించిన, అనుమతులు లేకుండా హాస్పిటల్స్, క్లినిక్ లు నడిపినా చర్యలు తప్పవని మేడ్చల్ జిల్లా వైద్యాధికారి డాక్టర్ ఉమ గౌరీ హెచ్చరించారు. మేడిపల్లి మండలం బోడుప్పల్ మున్సిపల్ కార్పొరేషన్ చెంగిచర్లలో శనివారం ఓ హాస్పిటల్ లైసెన్స్ రద్దు చేసి రెండు క్లినిక్ లను సీజ్ చేశారు. అర్హత లేకున్నా వైద్యం అందిస్తున్నారని ఫిర్యాదుతో తెలంగాణ వైద్య మండలి అధికారులు మేడిపల్లి మండలం బోడుప్పల్ లో తనిఖీలు నిర్వహించారు.
ఈ సందర్భంగా జిల్లా వైద్యాధికారి డాక్టర్ ఉమ గౌరీ మాట్లాడుతూ బోడుప్పల్ వెల్ విషెర్స్ హాస్పిటల్ లో రిజిస్ట్రేషన్ చేసుకున్న వైద్యురాలు గౌతమి రెండు సంవత్సరాలుగా పై చదువులకు వెళ్లారని, ఇప్పుడు లేరని, కానీ ఇక్కడ ఫార్మాసిస్ట్ వైద్యం అందిస్తున్నారని తేలింది. దాంతో హాస్పిటల్ కు సంబంధించిన లైసెన్సు రద్దు చేస్తున్నామని, అలానే అర్హతకు మించి వైద్యం అందిస్తున్న రక్షిత్ ఫస్ట్ ఎయిడ్ సెంటర్ ను, పల్స్ క్లీనిక్ ని సీజ్ చేస్తున్నామని అన్నారు. అర్హత లేకుండా వైద్యం అందించినా, అనుమతులు లేకుండా క్లినిక్ లు, హాస్పిటల్స్ నడిపినా చట్ట ప్రకారం చర్యలు తీసుకుంటామని హెచ్చరించారు.
